د رای شمېرنې له بشپړیدو مخکې به یوه رایه هم باطله نشي

ټاکنو خپلواک کمېسیون ویلي؛ تر هغې، چې د ټولو ولایتونو رایې بیا ونه شمېرل شي، یوه رایه به هم باطله نشي.

د ټاکنو خپلواک کمیسیون اوس  له یوه  عجیبه حالت سره مخ دی؛ د ثبات او همپالنې ټاکنډلې د جمعې پر ورځ اعتراضونه وکړل او له دې بنسټ یې د درې سوه زره رایو د باطلیدو غوښتنه وکړه او په دې برخه کې یې یوه ورځ وخت ټاکلی و.

د ټاکنو خپلواک کمیسیون ویاند علي افتخاري ویلي؛ دا قانوني غوښتنه نده، چې یوه ټاکنډله دې د رایو د یوې برخې باطلیدل مطرح کړي.

د نوموړي په وینا؛ تر هغې، چې د رایو بیا شمېرنه په ټولو ولایتونو کې نه وي بشپړه شوي، هیڅ رایه به باطله نشي.

د ولسمشریزو ټاکنو د نوماندانو شورا د تلې د شپږمې ټاکنو د باطلیدو او د بیا ځلي ټاکنو د تر سره کیدو غوښتنه راپورته کړې.

د ولسمشریزو ټاکنو د نوماندانو شورا ویاند شهاب حکیمي څرګنده کړې، چې د یوې نوې ادارې تر مشرۍ لاندې دې بیا ټاکنې تر سره شي؛ یوه لنډمهاله اداره دې رامنځته شي، چې هغه وکولی شي بې پرې ټاکنې تر سره کړي.            

د افغانستان د آزادو او عادلانه ټاکنو بنسټ اجرائیه مشر یوسف رشید ویلي، کمیسیون باید د اوسنيو ستونزو د حل لپاره له نوماندانو او ټاکنڅارو سره فني ناسته وکړي.

دغه راز د ولسي جرګې غړیو ویلي، چې د ټاکنو کمیسیون د پایلو د اعلام په اړه له بندون سره مخ شوی او د خلکو د پاکو رایو له مخې د لومړنیو پایلو د اعلام واک و ځواک نلري.

د ولسي جرګې مشرمیر رحمان رحماني ویلي، چې د ټاکنو خپلواک کمیسیون باید خلکو ته د رڼو ټاکنو له بهیره ډاډ څرګند کړي؛ خلک باید وپوهیږي، چې له رایو سره یې خیانت نه کیږي؛ ځکه، چې د هېواد دښمنانو له وحشته ډک خوبونه لیدلي او باید په پوره پاملرنه ګامونه پورته شي.

د یادې جرګې د غړیو د څرګندونو له مخې؛ د ټاکنو په لومړنیو پایلو کې ځنډ به هېواد له تازه بحرانونو سره مخ کړي . اړتیاده، چې له ټاکنډلو سره په همغږۍ کې د راروانو ننګونو مخه ونیول شي.