تازه خبرونه
د رښتر پېنځه اعشاریه نهه درجې زلزلې د کابل په ګډون د سیمې څو هېوادونه لړزولي
تېره شپه څه نا څه نهه نیمې بجې د رښتر پېنځه اعشاریه نهه درجې زلزلې د مرکزي او جنوبي آسیا تاجکستان، افغانستان، پاکستان او هند ځینې برخې ولړزولې.
دغه رازپه ټول پاکستان کې هم دې زلزلې خلک ووېرول او د خپلو کورونو او ودانیو پریښودو ته اړ شوي دی.
د هېواد بدخشان ولایت په ځانګړي توګه د دغې زلزلې له کبله اغېزمن شوی؛ ځکه، چې د زلزلې مرکز د افغانستان پولې ته نږدې په تاجکستان کې و. په داسې حال کې، چې دا ولایت د زلزلې له ځواکمنو ټکانونو سره مخ شو؛ خو د ځاني او مالي زیانونو راپور ترې ندی ترلاسه شوی.
د امریکا د ځمکپوهنې مرکز په ډاګه کړې؛ دا زلزله د رښتر پېنځه اعشاریه نهه درجې وه، چې مرکز یې د تاجکستان د لویدیځ په ۳۵ کیلومټرۍ مرغوب کې و.
د تاجکستان د بېړنیو حالاتو وزارت ویلي، چې زلزله د چین پولې ته څېرمه د تاجک پلازمېنې دوشنبي ختیځ ۲۴۰ کیلومتره لرې رامنځته شوې ده.
د دې هېواد د علومو اکاډمۍ د زلزلې مرکز د روسیې آر آی ای نووستي ته په ډاګه کړې، چې د زلزلې چټکتیا د رښتر ۶ اعشاریه یوه درجه اټکل شوې ده. دغې خبري سرچینې د بېړني حالت د کمیټې د څرګندونو له مخې ویلي، چې دغې زلزلې ځاني او مالي زیان ندی اړولی.
دغه راز د سیمې د څارنې ادارو دغه زلزله یو څه چټکه ښودلې ده؛ د هند د زلزلې ثبتولو ملي مرکز څرګنده کړې، چې دا زلزله د رښترشپږ اعشاریه درې درجې وه. په داسې حال کې، چې په پاکستان کې د زلزلې د څارنې ملي مرکز یې شپږ اعشاریه څلور بولي.
د امریکا ځمکپوهان بیا دا زالزله پېنځه اعشاریه نهه ښیي، چې مرکز یې د ځمکې په ۹۰ کیلو مټره ژوروالي کې اټکل کړی دی.
په اسلام آباد، کابل او نوي ډیلي کې حکومتي چارواکو ویلي، چې دا زالزله د هندوکش د همالیا د غرونو په لړۍ کې احساس شوې ده.
په پاکستان کې سیمه ییزو رسنیو څرګنده کړې، چې دا زلزله لږ تر لږه ۳۰ ثانیې روانه وه. دا په دې معنا ده، چې اغېز یې خورا پیاوړی و.
په کابل کې خلکو د یوې دقیقې لپاره په ځینو برخو کې د زلزلې احساس کړی؛ خو په پلازمېنه کابل کې هم تر دې دمه له ځاني او مالي زیانونه څه ویل شوي ندي.
په شمال لویدیځ او د پاکستان په پنجاب ایالت کې سیمه ییزو حکومتونو د بېړنیو حالاتو کمېټو ځاني او مالي زیانونو ته د لاسرسي لپاره چمتووالی نیولی دی.
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه4 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ2 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
نړۍ4 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی5 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه4 days ago
راشد خان د افغان بیسیم سوداګریز سفیر شو
-
لوبی2 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
لوبی4 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه5 days ago
د ایران ولسمشر پر درې ورځني سفر پاکستان ته ولاړ