د افغانستان اسلامي امارت رهبر شیخ هبة‌الله آخوندزاده ویلي، عالمان په شرعي چارو کې واک لرونکي دي او خلک یې اطاعت کوي؛ امیران د شریعت له مخې په سیاسي، جهادي او اصلاحي چارو کې د واک لرونکي ګڼل کېږي.

نوموړي ټینګار کړی، که دغه دواړه ډلې غوره وي او خپلې دندې سمې ترسره کړي، ټول خلک به اصلاح شي.

آخوندزاده دغه څرګندونې د کندهار ولایت د ولسوالیو او ښاري حوزو له عالمانو سره د اسلامي نظام د ټینګښت او پیاوړتیا لپاره په جوړه شوې غونډه کې کړې دي. په دې غونډه کې ګڼو عالمانو، مخورو او د اسلامي امارت یو شمېر لوړپوړو چارواکو ګډون کړی و.

د اسلامي امارت رهبر زیاته کړې، چې عالمانو په هر وخت کې د دین، اسلام او شریعت د ټینګښت لپاره هڅې کړې دي او په سختو شرایطو کې یې دین ژوندی ساتلی او تر خلکو رسولی دی.

هغه ویلي:« الله تعالی دین او اسلام عالمانو او امیرانو ته سپارلی او د هغه د ساتنې مکلفیت یې ور تر غاړې کړی دی. امیران په خپل ځواک د دین، اسلام او شریعت ساتنه کوي او عالمان د شرعي احکامو پر بیانولو هغه خلکو ته رسوي.»

آخوندزاده ویلي، چې عالمان د الله تعالی له لوري د الهي حقونو د ساتنې لپاره استازي او ځایناستي دي او پر هغوی دروند مسوولیت ایښودل شوی، چې د الله دین خلکو ته ورسوي، احکام یې ورته بیان کړي، ترې دفاع وکړي او خلکو ته دیني لارښوونې وکړي.

نوموړي زیاته کړې، عالمان د منکراتو مخه نیسي او زیانونه یې خلکو ته بیانوي.

هغه وایي، که عالمان خپلې دندې پر کلکه اراده ترسره کړي؛ په ټولنه کې به تر ډېره منکرات له منځه ولاړ شي او د جاهلیت دودونه به پای ته ورسېږي.

آخوندزاده ټینګار کړی؛ اوس د خدمت لپاره مناسب فرصت برابر شوی، چې د الله دین ته خدمت وشي او اسلامي شریعت پلي شي.

هغه همداراز ویلي:« دا د الله تعالی لوی نعمت دی او اوس مسلمانان داسې نظام لري، چې خلک شریعت ته رابولي. الله تعالی نن په افغانستان کې شرعي نظام ټینګ کړی دی. له شرعي امیر سره بیعت د مسلمانانو پر اتفاق او د جهاد له لارې ترلاسه شوی دی.»

د اسلامي امارت رهبر له عالمانو غوښتي؛ له یو بل سره مینه او باور پیاوړی کړئ، چې مخالفین د اختلاف او تفرقې د رامنځته کولو فرصت پیدا نه‌کړي. هغه ویلي، باید د اطاعت روحیه هم د عالمانو ترمنځ او هم د خلکو په منځ کې پیاوړې شي، چې یووالی ټینګ او د فتنې دروازې وتړل شي.

د بښنې نړیوالې ټولنې تازه څېړنه ښيي: د پاکستان هوايي برید، چې د مارچ پر شپاړلسمه په کابل کې د روږدو د درملنې پر مرکز«امید روغتون» ترسره شوی؛ « له نړیوال بشردوستانه قانون څرګنده سرغړونه» ده او ښايي د جنګي جنایت بېلګه وبلل شي.

یادې ټولنې ویلي؛ د دوی څېړنو داسې هیڅ شواهد نه‌دي موندلي، چې ګواکې دغه مرکز پوځي کارونې ته ځانګړی شوی و او یا په کې وسلې او مهمات ساتل کېدل.

د بښنې نړیوالې ټولنې د څرګندونو له مخې، د پاکستان دغه هوایي برید د نړیوال بشردوستانه قانون بنسټیز اصول؛ پر ځانګړي توګه د روغتیايي مرکزونو خوندیتوب او د پوځي موخو او ملکي وګړو ترمنځ د تفکیک اصل، تر پښو لاندې کړی دی.

د بښنې نړیوالې ټولنې د سویلي آسیا د برخې سرپرستې ایزابیل لاسي ویلي، پر «امید روغتون» برید« له نړیوال بشردوستانه قانون څرګنده سرغړونه» ده او ښايي د جنګي جنایت بېلګه وبلل شي.

هغې له پاکستان څخه غوښتي، چې د دغه مرکز د پر نښه کولو د پرېکړې بهیر په اړه روڼ، خپلواکه او بې پرې څېړنه ترسره کړي او پایلې یې له خلکو سره شریکې کړي.

د دغې ټولنې د موندنو له مخې؛ برید داسې مهال ترسره شوی، چې «امید روغتون» له یوې لسیزې ډېر وخت د درملنې یو روغتیايي مرکز پېژندل کېده او د برید پر مهال هم تر زر ډېر ناروغان په کې ول. د بښنې نړیوالې ټولنې ټینګار کړی، چې د مرکز د تخلیې لپاره هیڅ مخکینی خبرداری ورکړ شوی نه‌و.

یادې ټولنې ویلي، د دې راپور د چمتو کولو لپاره یې له ۶۰ څخه ډېر انځورونه او ویډیوګانې، تر ۳۰ زیاتې سپوږمکۍ انځورنې او همدارنګه د ۱۱ شاهدانو، کارکوونکو او د قربانیانو د کورنیو د غړو څرګندونې ارزولې دي.

د راپور له مخې، پاکستاني چارواکو هغه مهال ادعا کړې وه، چې دغه مرکز د وسلو او مهماتو د ساتنې لپاره کارېده؛ خو د خپرو شویو انځورونو او د مهماتو د پاتې شونو ارزونه د دوه‌یم ځل چاودنو او یا د وسلو د زېرمې د شتون هیڅ نښه نه‌تائیدوي.

بښنې نړیوالې ټولنې همدارنګه یادونه کړې، چې په افغانستان کې د ملګرو ملتونو مرستندوی پلاوي(یوناما) له دې مخکې تائید کړې وه، چې په دې برید کې لږ تر لږه ۲۶۹ ملکي وګړي وژل شوي او ۱۲۲ نور ټپیان دي.

یادې ټولنې له پاکستاني حکومت څخه غوښتي: که کافي شواهد موجود وي؛ نو ټول هغه کسان دې د نړیوالو قوانینو له مخې تر عدلي تعقیب لاندې راولي، چې د دغه برید د پرېکړې او عملي کولو مسوولیت یې درلود.

ملګرو ملتونو ویلي، چې د افغانستان په ختیځو سیمو کې د سختو اورښتونو او ناڅاپي سېلابونو له کبله تر اوسه له ۴۰ ډېر کسان مړه شوي، لسګونه نور ټپیان دي او یو شمېر کسان اوس هم نادرکه دي.

د ملګرو ملتونو د سرمنشي ویاند سټیفن دوجاریک ویلي؛ دغو سېلابونو کورونو، دولتي ودانیو او سوداګریزو مرکزونو ته پراخ زیانونه اړولي او په زیانمنو سیمو کې د لټون او ژغورنې عملیات روان دي.

د نوموړي د څرګندونو له مخې، ملګري ملتونه له بشري مرستندویانو سره د همغږۍ له مخې د زیانونو د کچې ارزونه کوي او د سېلاب ځپلیو لپاره د بېړنیو مرستو رسولو ته چمتووالی نیسي.

دوجاریک زیاته کړې؛ بېړنۍ سرپناوې، خوراکي توکي، روغتیايي چوپړتیاوې، د ژوند لومړني وسایل او رواني ملاتړ د سېلاب ځپلیو لپاره د مرستو له مهمو لومړیتوبونو څخه دي.

نوموړي همدارنګه ویلي؛ ګرځنده روغتیايي ډلې زیانمنو سیمو ته لېږل شوې دي، روغتیايي مرکزونه د بېړنیو حالاتو د سمبالولو لپاره چمتو شوي او طبي وسایل، خوراکي توکي او د تغذیې اړوند توکي دغو سیمو ته لېږدول کېږي.

د ملګرو ملتونو د سرمنشي ویاند ټینګار کړی، چې د سړکونو ویجاړېدا او جغرافیایي ستونزې د مرستو د رسولو بهیر له ننګونو سره مخ کړی دی.