د شوروي اتحاد ځواکونه د ایمان او ټینګې ارادې پر زور وتلو ته اړ شول – اسلامي امارت

د افغانستان اسلامي امارت د پخواني شوروي اتحاد د سرو لښکرو د ماتې او له افغانستان څخه د وتلو د اووه دېرشمې کليزې په مناسبت په خپره شوې خبرپاڼه کې دغه ورځ د هېواد د تاريخ له تر ټولو ویاړلو پاڼو بللې او دا د الله تعالی حضور ته د شکر ورځ بولي.

په دې خبرپاڼه کې راغلي، چې د سلواغې شپږويشتمه د افغانستان مسلمان ملت هغه ستره بريا رايادوي، چې د نړۍ د يو ستر ځواک پر وړاندې يې تر لاسه کړې؛ داسې بريا، چې د جهاد، مبارزې، سرښندنو، هجرتونو او د افغانستان د خلکو د ګڼو کړاوونو پر بيه ترلاسه شوې ده.

اسلامي امارت ټينګار کړی؛ همدا سرښندنې د دې لامل شوې، چې الله تعالی دا وياړ د افغانستان خلکو ته ور پر برخه کړ، چې د وخت شوروي اتحاد ته یې ماتې ورکړه او هغه یې له خپلې خاورې وتلو ته اړ کړ.

د خبرپاڼې د يوې برخې له مخې؛ په تېرو څه باندې سل کلونو کې د درېيم ځل لپاره د افغانانو آزادي له اشغالګرو تر لاسه شوې، چې د دې هېواد د مسلمان ولس د عزم، ژمنتيا او ټينګ هوډ څرګندونه کوي او تل د خپل دين، عقيدې او خپلواکۍ د دفاع لپاره ژومن او په ډګر کې ولاړ پاتې خلک دي.

په خبرپاڼه کې پر يرغلګرو قدرتونو غږ شوی، چې د تېرو سل کلونو له تاريخي تجربو څخه درس واخلي او نور د افغانستان د خلکو د آزادۍ او حريت پر وړاندې د يرغل هڅه ونکړي.

همداراز د افغانستان د خلکو پر ويښتابه، هوښيارۍ او اسلامي يووالي هم ټينګار شوی او څرګندوي، چې د يووالي ساتنه او د نيکونو پر لار تګ؛ د دين، عقيدې او د هېواد د خپلواکۍ د ساتنې تضمين دی.

افغانستان اسلامي امارت يو ځل بيا مجاهدينو او د افغانستان خلکو ته د دې ورځ مبارک وایي او د استقامت او يووالي پر ساتلو يې ټينګار کړی دی.