د ملګرو ملتونو امنیت شورا د یوناما ماموریت یو کال وغځاوه

د ملګرو ملتونو امنیت شورا د دوشنبې پر ورځ د رایو له مخې هغه پرېکړه‌لیک تصویب کړ، چې په افغانستان کې یې د ملګرو ملتونو د مرستندویه پلاوي (یوناما) ماموریت یو کال غځولی دی.

د امنیت شورا ټولو ۱۵ غړیو هېوادونو دغه پرېکړه‌لیک ته مثبته رای ورکړه، چې په افغانستان کې د دې ماموریت د دوام لپاره د نړیوالې ټولنې پراخ ملاتړ څرګندوي.

یوناما په افغانستان کې د ملګرو ملتونو تر ټولو مهم سیاسي ماموریت ګڼل کېږي او د سولې او ثبات د پیاوړتیا، د بشري مرستو د همغږۍ، د بشري حقونو د ودې او همدارنګه د مهمو سیاسي او پراختیايي موضوعاتو په اړه له افغان چارواکو او نړیوالو لوریو سره د اړیکو او همغږۍ مسوولیت پر غاړه لري.

د یوناما د ماموریت غځول داسې مهال ومنل شول، چې افغانستان اوس هم له جدي بشري او اقتصادي ستونزو سره مخ دی.

یوناما په ۲۰۰۲ز. کال کې د اسلامي امارت د لومړي پېر له پای ته رسېدا وروسته جوړه شوه او ماموریت یې عموماً هر کال غځول کېږي؛ خو په ۲۰۲۱ز. کال کې، چې اسلامي امارت بېرته واکمن شو؛ د دې ادارې ماموریت د شپږ میاشتو لپاره وغځول شو، چې د فعالیتونو په څرنګوالي کې یې د اړتیا وړ احتمالي بدلونونه وارزول شي.

همدارنګه د روان کال په مارچ میاشت کې له افغانستان سره د مرستو او د تعامل د څرنګوالي د بیاکتنې په اړه د واشنګټن له غوښتنې وروسته د یوناما ماموریت د درې میاشتو لپاره غځول شوی و.