Connect with us

سوداگري

د نفتو يو ستر چينايي شرکت CNPCI په افغانستان کې د پانګونې ډاډ څرګند کړ  

خپور شوی

د

(Last Updated On: وری ۱۸, ۱۴۰۱)

د چین هېواد د نفتو د تولید او پروسس ملي شرکت CNPCI مشر کابل ته په سفر کې ويلي، چې په افغانستان کې پانګونې ته لیواله دي.

د CNPCI نړيوال شرکت مشر  حن ريومن د لومړي وزیر له اداري مرستيال مولوی عبدالسلام حنفي سره په ليدنه کې ويلي، غواړي، چې په افغانستان کې پانګونه وکړي.

د اسلامي امارت د ویاند مرستیال انعام الله سمنګاني ټویټ کړی، چې د افغانستان اسلامي امارت د لومړي وزیر لومړي مرستیال مولوي عبدالسلام حنفي نن سهار د چین د نړیوال CNPCI شرکت له مشر حن ریومن او مل پلاوي سره د خپل کار په دفتر کې وکتل.

د چين د نفتو دولتي شرکت(CNPCI)  مشرحن ريومن د لومړي وزیر له اداري مرستيال مولوي عبدالسلام حنفي سره په ليدنه کې ويلي، چې شرکت يې غواړي په افغانستان کې د نفتو په برخه کې پانګونه وکړي.

مولوي عبدالسلام حنفي د ياد شرکت له لوري په افغانستان کې له پانګونې هر کلی وکړ او څرګندوي، چې اوس له بل هر وخت ډې په افغانستان کې امنيت ټينګ دی او ټولو کورنيو او بهرنيو شرکتونو ته د پانګونې ښه زمينه برابره شوې ده.

ملا عبدالسلام حنفي زیاته کړې، چې د افغانستان حکومت د بهرنيو سوداګرو او شرکتونو لپاره په افغانستان کې د پانګونې په برخه کې آسانتياوې برابروي.

د افغانستان خصوصي سکتور هم په هېواد کې د چینې پانګوالو پانګونه اړینه بولي او زیاتوي، چې د بهرنیو پانګونې زیاتول کولی شي اقتصادي ناخوالې پای ته ورسوي.

د هېواد د صنایعو او کانونو خونې مسوولین هم  وایي، چې په افغانستان کې د بهرنیو پانګوالو پانګونه کولی شي بې کاري او اقتصادې ستونزې حل کړي، دوی د افغانستان له اسلامی امارته غوښتنه کوي، چې د کانونو په سکتور کې دې افغان او بهرنیو مشترکه شرکتونو ته تړونونه ورکړی، چې د افغان شرکتونو وړتیا او ظرفیت هم لوړشي.

د صنایعو او کانونو خونې مشر شېرباز کمین زاده وایي: مونږ د بهرنیو پانګونو هرکلی کوو؛ خو مهمه خبره داده، چې زمونږ کانونه باید هغه شرکتونو ته ورکړ شي، چې له افغانانو سره د وړتیاوو د لوړولو لپاره شریک شي.

د افغانستان د اوسپنې ویلي کولو ټولنې اجرائیه مشر عبدالنصیر رشتیا وایي: مونږ د بهر نیوپانګونو استقبال کوو؛ خو حکومت باید بهرنې شرکتونه د دې پانګونو عملی کولو ته اړ کړي.

د اقتصادي چارو کارپوهان هم په افغانستان کې د بهرنیو پانګونو پراختیا مهمه بولي او زیاتوي، چې د افغانستان اسلامي امارت باید د پانګونو دعملي پيل هڅو لپاره هڅې ګړندۍ کړي.

اقتصادي کارپوه امید قاسمزی څرګندوي: مونږ له حکومته هیله من یوو، چې بهرنۍ پانګونې باید له قرار داد څخه عملي بهیر ته دننه شي. په تېر کې هم بهرنیو شرکتونو ژمنې کولې او اوس باید د قرارداد پر عملی چارو ټینګار وشي.

دا په داسې حال کې ده، چې په اقتصادي چارو کې د لومړي وزیر لومړی مرستیال ملا عبدالغني برادر او د کانونو او پټرولیم وزارت چارسمبالی مولوي شهاب الدین دلاور او ورسره مل پلاوي یې نن په یوه رسمي سفر سرپل ولایت ته رسېدلي دي.

سوداگري

افغانستان او پاکستان د سوداګرۍ او ټرانزیټ په برخه کې د همکارۍ هوکړه وکړه

Published

on

(Last Updated On: وری ۹, ۱۴۰۳)

په کابل کې د پاکستان سفارت چارسمبالي عبیدالرحمن نظاماني د چارشنبې پر ورځ ( د وري اتمه ) نا وخته په یوه ویډیویي پیغام کې څرګنده کړې، چې په کابل کې پاکستاني پلاوي د اسلامي امارت له چارواکو سره د ګډو ګټو د خوندیتابه او دوه اړخیزې سوداګرۍ د اسانتیاوو رامنځته کولو لپاره هوکړه کړې ده.

دغه پلاوی دوه ورځې مخکې د پاکستان د سوداګرۍ وزارت د مرستیال محمد خرم اغا پر مشرۍ کابل ته راغلی و.

د پاکستان سفارت چارسمبالي زیاته کړې، چې افغانستان ته د پاکستاني پلاوي سفر بریالی و.

عبید الرحمن نظاماني دغه سفر له افغانستان سره د دوه اړخیزې سوداګرۍ او ټرانزیټ په برخو کې د ځواکمنو اړیکو د رامنځته کولو لپاره د پاکستان د ښو هڅو ښکارندویي کوي.

هغه ویلي، دواړو خواوو هوکړه کړې، چې د ګډو ګټو لپاره به ګډ کار کوي. افغانستان او پاکستان په یو شمېر برخو کې د دوه اړخیزې سوداګرۍ او ټرانزیټ لپاره د اسانتیاوو پر برابرولو هوکړه وکړه.

د پاکستان د سوداګرۍ وزارت د مرستیال پر مشرۍ پلاوی د دوشنبې پر ورځ ( د وري شپږمه) کابل ته راغی او د سې شنبې پر ورځ یې د بهرنیو چارو وزارت له چارسمبالي امیرخان متقي سره وکتل.

د بهرنیو چارو وزارت د ویاند مرستیال ضیا احمد په ایکس پاڼه کې لیکلي، چې دوی د سې شنبې د ورځې په لیدنه کې د سوداګرۍ، ټرانزیټي او اقتصادي اړیکو پر پیاوړتیا خبرې وکړې.

د نوموړي د څرګندونو له مخې؛ امیر خان متقي د پاکستان د سوداګرۍ وزارت له مرستيال سره په ليدنه کې د ټرانزيټي ستونزو او د هغوى د حل په اړه ” تفصيلي” خبرې وکړې.

هغه زیاته کړې، چې خرم اغا ژمنه وکړ، چې د ټرانزیټي ستونزو د حل لپاره به ژر تر ژره یوه حل‌لار ومومي.

دغه پاکستاني پلاوی د افغانستان پر دوه ختیځو ولایتونو د پاکستان د هوايي بریدونو او د دواړو لورو ترمنځ د اړیکو له ترینګلتیا وروسته د اسلامي امارت د صنعت او سوداګرۍ وزارت پر رسمي بلنه کابل ته سفر کړی دی.

Continue Reading

سوداگري

یو ترکي شرکت د یتیم‌تاق پر سمنټو پانګونې ته چمتووالی څرګند کړ

Published

on

(Last Updated On: وری ۸, ۱۴۰۳)

د کانونو او پټرولیم وزارت سرپرست شهاب الدین دلاور د ترکیې د ۷۷ شرکت له رییس سره وکتل.

د کانونو او پټرولیم وزارت څرګنده کړې؛ په دې کتنه کې، چې پرون تر سره شوې د ۷۷ شرکت رییس د اسلامي امارت هڅې او لاسته راوړنې وستایلې او وړاندیز یې وکړ، چې غواړي د یتیم‌تاق سمنټو پروژې تړون لاسلیک او عملي چارې یې پیل کړي.

ویل کیږي، چې د کانونو او پټرولیم وزارت چارسمبالي د یتیم‌تاق سمنټو پروژې د تړون په لاسلیکولو کې د همکارۍ څرګندولو تر څنګ له یاد شرکت څخه د پروپوزل د وړاندې کولو، غوره ټولنیزو خدمتونو او چاپېریال ساتنې په برخه کې د اړوند ژمنو د پلي کېدا غوښتنه وکړه.

د کانونو او پترولیم وزارت ویاند همایون افغان ویلي په هېواد کې ۷۷ ساختماني ترکي شرکت مسوولینو د کانونو وزارت له رهبرۍ سره د لیدنې پرمهال ویلي، چې غواړي د جوز جان د یتم‌تاق د سیمې د سمنټو په کان کې پانګو نه وکړي، چې د کانونو وزارت هم ور سره د همکارۍ  ژمنه کړې ده.

د خصوصي سکټورغړي هم وایي، چې هېواد د سمنټو د تولید په برخه کې ښه وړتیا لري او په دې سکټور کې د پانګونې پراختیا کولی شي د کاري زمینو د رامنځته کولو ترڅنګ د عوایدو په پراختیا کې هم د پام وړ زیاتوالی رامنځته کړي.

د صنعتکارانو ټولنې رییس عبدالجبار ساپی ویلي، چې د ۷۷ ساختماني ترکې شرکت پانګونه کولی شي په زرګونه هېوادوالو ته د کار د زمینې د برابرولو ترڅنګ نور بهرني پانګوال هم د هېواد په کانونو کې د پانګونې او د کانونو په سکټور کې د شته ظرفیتونو په برخه کې وهڅوي.

ویل کیږي، چې هېواد به د سمنټو د تولید په سکتور کې ځان‌بسیاینې ته ورسیږي. له دې مخکې په کندهار، هرات او پروان ولاتیتونو کې هم پر لوړ ظرفیت د پانګونې بهیر پیل شوی دی.

Continue Reading

سوداگري

د افغانستان او پاکستان د سوداګرۍ استازیو پر ننګونو خبرې وکړې

Published

on

(Last Updated On: وری ۷, ۱۴۰۳)

د افغانستان د صنایعو او سوداګرۍ وزارت چارواکو په کابل کې د پاکستان د سوداګرۍ وزارت له پلاوي سره په ګډه ناسته کې د سوداګریزو اړیکو پر وړاندې د شته ننګونو د حل په اړه خبرې وکړې.

له هغې وروسته، چې د افغانستان او پاکستان ترمنځ وروستیو سیاسي او پوځي ناندرو او تاوتریخوالي پر سوداګریزو او ټرانزیټي فعالیتونو سیوری وغوړاوه؛ نو د پاکستان د سوداګرۍ وزارت د مرستیال پر مشرۍ یو پلاوی د صنعت او سوداګرۍ وزارت پر رسمي بلنه کابل ته راغی، ګې د سوداګرۍ په اړه پر شته ننګونو بحث او خبرې وکړي. 

د هېواد د صنایعو او سوداګرۍ وزارت سرپرست ويلي، چې د وروستیو سیاسي کړکېچونو له کبله د افغانستان او پاکستان ترمنځ سوداګریزې او ټرانزیټي اړیکې له ستونزو سره مخ دي او په دې ناسته کې هڅه کېږي، چې شته ستونزو ته د اساسي حل لارې – چارې ولټول شي او د سوداګرۍ موضوع له سیاسي مسایلو سره ونه‌تړل شي.

د اقتصادي کارپوهانو پر اند افغانستان د منځنۍ آسیا او جنوبي آسیا ترمنځ ټرانزیټي لار ده؛ نو اسلامي امارت کولی شي له دې لارې پر پاکستان د فشار زیاتولو لپاره کار واخلي، چې پاکستان د افغانستان سوداګرۍ ته د ستونزو د رامنځته کولو مخه ونیسي.

ویل کیږي، چې ټاکل شوې په دې ناسته کې د PTA پر ترجیحي سوداګریز تړون، د  TAD  پلي کېدا او د اپټا د خبرو اترو وروستي کولو او همدارنګه هوايي ټرانزیټ، تورخم، چمن او سپین بولډک په بندرونو کې ۲۴ ساعته فعالیتونو او نورو سوداګریزو موضوعاتو خبرې وشي.

Continue Reading

Trending

Copyright © 2022 Ariana News. All rights reserved!