تازه خبرونه
د هرات په غوريان ولسوالۍ کې د اوسپنې کان د يوې برخې د اکتشاف چارې پيل شوې
د افغانستان د کانونو او پترولیم وزارت ويلي؛ د هرات ولایت په غوریان ولسوالۍ کې د اوسپنې د کان په څلورم بلاک کې یوه کورني شرکت د اکتشاف چارې پیل کړې. دغه کان څلور بلاکونه لري، چې څه باندې پېنځه نیم میلیارد دالره پرې پانګونه شوې ده.
دغه پروژه د څلورو کورنيو شرکتونو له خوا د ځينو بهرنيو شرکتونو په همکارۍ پيل شوې ده.
د کانونو او پټرولیم وزارت چارسمبالي شهاب الدین دلاور ويلي، چې په نږدې پېنځه کلونو کې به د دغه کان د استخراج چارې پیل شي.
نوموړی وايي، په دغه کان کې شاوخوا پېنځه میلیارد او ۵۷۰ میلیون دالره پانګونه شوې، چې مساحت یې ۹۵۰ کیلومتره مربع دی او د اوس لپاره یې د یوې برخې د اکتشاف کار پیل کړی او شاوخوا شل زره کسان به په کې کار وکړي.
د هرات والي نور احمد اسلام جار پانګوالو ته امنیتي ډاډ څرګند او وایي: هغو وروڼو، چې دلته پانګونه کړې او یا غواړي له افغانستان سره په هرات کې پانګونه کوي له امنیتي اړخه دې ډاډه وي؛ هیڅ ستونزه نشته، هیڅ خطر به زمونږ پانګوال او سوداګر له ګواښ سره مخ نهکړي.
د دغه ولايت د غوريان ولسوالۍ د اوسپنې په کان کې د کورنيو شرکتونو تر څنګ د ايران، ترکيې او انګلستان بهرني شرکتونه هم همکاري کوي.
د دغه کان د يو شمېر شرکتونو مسوولينو ويلي؛ هڅه کوي، چې د دغه کان د استخراج چارې له ټاکلي وخت مخکې پاى ته ورسوي.
د غوریان د اوسپنې کان د یوه شرکت مسوول ضیاءالحق ستانکزی وایي: له شل ورځو ډېر وخت وشو، چې مونږ په ساحه کې کار پيل کړى؛ مونږ خپل روان ساتلی او روان یې ساتو.
د سيمې خلک خوښ د اړوند کارونو له پیل دي؛ خو ټينګار کوي، چې د دغه کان د نږدې کليو خلکو ته باید د دې کان ګټه ورسيږي.
د هرات سیمه ییز چارواکي وايي، اسلامي امارت په دغه ولایت کې له شل ډېرې لویې اقتصادي پروژې تر کار لاندې لري.