د ولسمشرۍ راتلونكې ټاكنې به رڼې او عادلانه وي

حامد كرزي د ټاكنو په افغان بڼې له ټينگار سره وويل، چې:

د ولسمشرۍ د ټاكنو پر بهير دې د ډېر لگښت مخنيوى وشي او د بهرنيانو د معاشونو سرچينه دې نه گرزي.

هغه له ملي شورا وغوښتل، چې د ټاكنو قانون دې تصويب او قانوني تشه  دې ډكه شي.

افغان ولسمشر حامد كرزى وايي، چې:

د ولسمشرۍ او ولايتي شورا راتلونكې ټاكني به د ټاكنو د كميسيون له ټاكلي برنامي سره سم  په خپل وخت ترسره شي.

هغه وايي هڅه كوي، چې ټاكنې شفافې او پرته  له درغليو ترسره او په هېواد كې  د ثبات د ټينگښت لامل وگرزي.

حامد كرزي وويل:

كه څه هم  په تېرو ټاكنو كې د ملگرو ملتونو او بهرنيانو ونډه مهمه وه، خو له يوې خوا  مو دا ملي بهير د بهرنيانو د لاسوهنې لامل شو او له بلې خوا د ټاكنو لگښت ډېرگران تمام شو.

نوموړى وايي:

په تېرو پارلماني ټاكنو كې هره رايه په څلويښت دالره تمامه شوې، چې دا بهير بايد د بهرنيانو د معاشونو د تمويل سرچينه ونه گرزي.

ولسمشر كرزي د ټاكنو قانون تصويبول اړين  وبلل او له ملي شورا څخه يې وغوښتل، چې  د ټاكنو قانون تصويب كړي.

حامد كرزى وايي، چې د راتلونكيو ټاكنو نوماندان بايد له  قانون سره سم خپله انتخاباتي مبارزه تنظيم كړي.

هغه ډاډ څرگند كړ، چې:

حكومت به د ټاكنو امينت په بشپړه توگه تامينوي، چې خلك په ټوليزه توگه په كې  ونده واخلي.

د ولسمشر په وينا، امنيتي ارگانونو ته دنده سپارل شوې او په دي برخه كې نور كارونه هم دوام لري.