د ټاكنيزو شكايتونو كميسيون هم د وروستي نوملړ په اعلامولو كې د ځنډ خبره كوي

نن د لړم پنځه ويشتمه نېټه ده، چې د ټاكنو خپلواك كميسيون د مهال ويش له مخې بايد د نوماندانو وروستى نوملړ اعلام شوى واى؛ خو د ټاكنيزو شكايتونو د څېړنو كميسيون وايي، د ليرې شويو نوماندانو د اعتراضونو او شكايتونو د څېړنيزې مودې د غزيدو له كبله دغه پروسه اضافي وخت واخلي.

دا په داسې حال كې ده، چې د نوماندانو د وروستي نوملړ په اعلانيدو كې ځنډ د يو شمېر احتمالي نوماندانو او ټاكنو د خپلواك كميسيون غبرگونونه راپارولي دي.

لكه څرنگه، چې د ټاكنو خپلواك كميسيون پر ټاكلې نېټه د نوماندانو لومړنى نوملړ اعلام نكړ، د ټاكنيزو شكايتونو كميسيون هم د وروستي نوملړ په اعلامولو كې د ځنډ خبره كوي.

د ټاكنيزو شكايتونو كميسيون چارواكي وايي، د دوى څېړنې د ټاكنو د استازيو په حضور كې روانې دي او هڅه كوي، چې دغه بهير په چټكتيا پايته ورسيږي.

د ټاكنيزو شكايتونو كميسيون وياند نادر محسني وايي، تراوسه يوازې پنځوس فيصده شكايتونه څېړل شوي او بشپړيدل يې نور وخت ته هم اړتيا لري.

د ټاكنيزو شكايتونو د كميسيون د دغو څرگندونو په غبرگون كې احتمالي نوماندان هر يو گل اغا شېرزي او بسم الله شېر خپل غبرگونونه څرگند كړل.

د ټاكنو خپلواك كميسيون كمشنر سرير احمد برمك وايي:

كه له يوې خوا د ټاكنو خپلواك كميسيون پر ټاكلې نېټه د نوماندانو د وروستي نوملړ پر اعلامولو ټينگار كوي؛ نو له بلې خوا زياتوي، چې د ټاكنيزو شكايتونو كميسيون له څېړنو وروسته به دغه لست دوى هم د خپل صلاحيت له مخې وڅيړي.