د پاكستان يوه ځانگړې حكومتي كړۍ د افغانستان په ناامنيوكې لاس لري- جنرال عظيمي

د افغانستان ملي دفاع وزارت وايي، چې:

په افغانستان كې د امن او ثبات د ټينگښت لپاره په كارده، چې نړيواله ټولنه د ترهگرو اصلي مركزونه او پټنځايونه په نخښه كړي.

د ملي د فاع وزارت وياند ظاهرعظيمي وايي، چې:

د پاكستان يوه ځانگړې حكومتي كړۍ تروريزم تمويلوي او ترهگرروزي، چې د افغانستان د ناامنيو تر شا هم د همدغې كړۍ لاس دى.

په افغانستان كې د آيساف ځواكونو وياند له پاكستان وغوښتل، چې له ترهگرو ډلو سره اړيكې پرې كړي.

د آريانا راډيو- ټلويزيون خبريال عبدالعزيز كريمي  څرگنده كړې، چې :

د افغانستان د ناامنيو په باب د افغان چارواكو د پرلپسې څرگندونو په بهير كې دا ځل د افغانستان ملي دفاع وزارت او په افغانستان كې آيساف ځواكونو هم پاكستان ته گوته ونيوه، چې د افغانستان په ناامنيو كې لاس لري.

د ملي د فاع وزارت وياند ظاهرعظيمي او د آيساف وياند كريسټين جاكوبسن د چارشنبې په ورځ(د تلې ۲۰) خبري رسنيو ته وويل، چې:

پاكستان له ترهگرو ډلو سره مرسته كوي، روزي يې او تمويلوي يې؛ نو، ځكه په افغانستان كې جگړه نه دريږي.

د ملي دفاع وزارت وياند زياتوي، چې:

نړيواله ټولنه او په ځانگړې توگه نړيوال پوځونه كه د ترهگرو پټنځايونه او مركزونه، چې له ډيورند كرښې پورې غاړه دي؛ په نخښه نكړي، نو په افغانستان كې ثبات نه شي راتلاى.

په كابل كې د آيساف ځواكونو وياند هم د حقاني له ډلې سره د پاكستان د استخباراتي شبكې ملاتړ تائيدوي او وايي:

پاكستان بايد د ترهگرو ډلو ملاتړ ونكړي؛ ځكه، چې دا د افغانستان او پاكستان گډ دښـمن دى. پاكستان ته پكار ده، چې د دغو شبكو په له منځه وړلو كې له نړيوالې ټولنې سره مرسته وكړي.

دا په داسي حال كې ده، چې د امريكا پوځ پخواني لوى درستيز مايك مولن د لومړي ځل لپاره له  حقاني شبكې سره د پاكستان د استخبارتي ادارې له همكارۍ پرده پورته كړې. د هغه له څرگندونو او په كابل كې د سولې د عالي شورى د رييس له وژل كېدو وروسته د امريكا او پاكستان –  پاكستان او افغانستان  اړيكې ترينگړې شوې دي.