تازه خبرونه
د پاکستاني رژیم په بریدونو کې سلګونه کسان «شهیدان» او زرګونه نور بېځایه شول
د حمدالله فطرت د څرګندونو له مخې؛ په دې هوایي او توپچي بریدونو کې د هېواد پکتیکا، پکتیا، کندهار، ننګرهار، کونړ، کابل، خوست، نورستان او لغمان ولایتونه پر نښه شوي دي.
د افغانستان اسلامي امارت مرستیال ویاند حمدالله فطرت څرګنده کړې، چې د ۲۰۲۶ ز.کال د فبرورۍ له دوهویشتمې څخه د اپریل تر څلورمې پورې پر افغان خاوره د پاکستانیو پوځیانو په بریدونو کې سلګونه ملکي وګړو ته پراخ ځاني او مالي زیانونه اوښتي دي.
د حمدالله فطرت د څرګندونو له مخې؛ په دې هوایي او توپچي بریدونو کې د هېواد پکتیکا، پکتیا، کندهار، ننګرهار، کونړ، کابل، خوست، نورستان او لغمان ولایتونه پر نښه شوي دي.
په دې عملیاتو کې ۷۶۱ ملکي وګړي «شهیدان» شوي او ۶۲۶ نور ټپیان دي.
همدارنګه د دې بریدونو په پایله کې ۲۷زره ۴۰۷ کورنۍ بې ځایه شوې دي.
فطرت زیاته کړې، چې پر ځاني زیانونو سربېره ودانیزو بنسټونو او د ملکي وګړو کورونو ته هم درانده مالي زیانونه رسېدلی دی؛ ۱۱۴۰ کورونه او ۲۵۶ دوکانونه بشپړه ویجاړ شوي دي.
پردې سربېره په دې بریدونو کې ۳۴ جوماتونه، ۱۳ ښوونځي، ۱۳ دیني مدرسې، ۳ روغتیايي مرکزونه او ۴۲ موټرونه هم ویجاړ شوي دي.
د اسلامي امارت د ویاند مرستیال څرګنده کړې؛ په دې بریدونو کې په ټولیزه توګه ۱۴زره ۹۷۳ توغندي، هاوانونه او د توپ مرمۍ ویشتل شوي، چې له کبله یې ملکي وګړو ته پراخه مرګ او ژوبله اوښتې او د هغوی ملکیتونه ویجاړ شوي دي.
فطرت زیاته کړې؛ د دغو بریدونو په پایله کې ۶۶۱ څاروي هم له منځه تلي، چې کلیوالي کورنیو ته یې د پام وړ اقتصادي زیانونه اړولي دي.