د اسلامي امارت رییس‌الوزراء ملا محمدحسن آخوند نن له غرمې مخکې په ارګ کې د ازبکستان د لومړي وزیر له مرستیال جمشید خواجه‌یوف سره، چې تېره ورځ د یوه لوړپوړي پلاوي پر مشرۍ کابل ته راغلی، ولیدل.

په دې لیدنه کې د ریاست‌الوزراء د دفتر عمومي رییس ملا عبدالواسع، د کانونو او پټرولیم وزیر هدایت‌الله بدري او په ازبکستان کې د اسلامي امارت سفیر عبدالغفار بحر هم ګډون درلود.

جمشید خواجه‌یوف د لیدنې په پیل کې ویلي، افغانستان ته د ازبکستان د وزیرانو، مرستیالانو، سوداګرو او پانګه‌والو د دغه لوی پلاوي د سفر موخه د دواړو هېوادونو ترمنځ د اقتصادي او سیاسي اړیکو پراخول او پیاوړي کول دي.

هغه د افغانستان او ازبکستان ترمنځ ښو اړیکو ته په نغوته کې ویلي، افغانستان د ازبکستان په بهرنۍ تګلاره کې ځانګړی ځای لري او د دې سفر اصلي موخه د ازبکستان د ولسمشر شوکت میرضیایوف د لارښوونې له مخې د پانګونې او سوداګرۍ په برخو کې د شویو ژمنو عملي پلي کول دي، چې دواړه هېوادونه یې پایلې وویني.

د ازبکستان د لومړي وزیر مرستیال زیاته کړې، تېر کال ازبکستان ته د افغانستان ټول صادرات ۱۵۰ میلیون ډالرو ته رسېدلي وه؛ خو د روان کال له پیل څخه تر اوسه دغه شمېر ۱۱۱ میلیون ډالرو ته رسېدلی او تمه ده، چې د کال تر پایه نور هم زیات شي.

نوموړي ویلي، ازبکستان تر اوسه د افغانستان وګړو ته پېنځه زره ویزې صادرې کړي، چې دا د دواړو هېوادونو ترمنځ د دوستۍ او اقتصادي اړیکو پراختیا ښیي.

د اسلامي امارت د ریاست‌الوزراء رییس ملا محمدحسن آخوند د ازبکستان د لومړي وزیر مرستیال او ورسره مل پلاوي ته د ښه راغلاست ترڅنګ ویلي، د دغه پلاوي سفر د افغانستان او ازبکستان ترمنځ د اړیکو د پیاوړتیا لپاره مهم ګام دی.

هغه زیاته کړې، د دې پلاوي سفر او د اقتصادي اړیکو پراختیا د افغانستان پر راتلونکي د دغه هېواد د قوي باور څرګندونه کوي.

د لیدنې په پای کې ملا محمدحسن آخوند د ازبکستان د لومړي وزیر مرستیال ته ډاډ ورکړ، چې افغانستان له دغه دوست او ورور هېواد سره د اړیکو له پیاوړتیا خوښ دی او د شویو ژمنو پلي کولو ته بشپړ ژمن پاتې دی.

د بدخشان والي محمد اسماعیل غزنوي او د اسلامي امارت د دفاع وزارت د وسله‌والو ځواکونو لوی درستیز فصیح‌الدین فطرت په بېلابېلو څرګندونو کې د هېواد پر امنیت او د هر ډول امنیتي ګواښونو پر مخنیوي ټینګار کړی دی.

محمد اسماعیل غزنوي مخالفانو ته په خپله وینا کې څرګنده کړې؛ هیچا او هیڅ ډلې ته به اجازه ورنه‌کړ شي، چې د افغانستان امنیت وګواښي.

هغه له مخالفانو غوښتي، چې له ورانکارۍ لاس واخلي او د هېوادوالو امنیت ګډوډ نه کړي.

نوموړي ویلي:« په تېرو شل کلونو کې هغه مهال، چې د ناټو او امریکا ځواکونو ملاتړ درسره و؛ څه مو وکړل؟ مونږ ستاسو پر ضد د مبارزې او جګړې تجربه لرو او ښايي پر هېواد د واکمنېدا هیله مو له ځان سره ګور ته یوسئ.»

هغه له مخالفانو وغوښتل، چې د اوسني امنیت ارزښت وپېژني او که کومه ستونزه لري؛ د خبرو له لارې یې حل کړي.

دغه راز د دفاع وزارت لوی درستیز فصیح‌الدین فطرت د بدخشان ولایت زیباک ولسوالۍ ته د سفر پر مهال ویلي؛ امنیتي ځواکونه به هیچا او هیڅ ډلې ته اجازه ورنه‌کړي، چې د افغانستان امنیت ګډوډ کړي. نوموړي زیاته کړې، پاکستان د اسلامي امارت د ځینو مخالفانو ملاتړ کړی؛ خو هغوی د اسلامي امارت د ځواکونو د مقاومت پر وړاندې ناکام شوي دي.

هغه د سرحدونو د دفاع لپاره د امنیتي ځواکونو له بشپړ چمتووالي خبر هم ورکړی او ګواښ کوی، چې د ناامنۍ د رامنځته کولو هره هڅه به له پرېکنده غبرګون سره مخ شي.

د سرچینو د څرګندونو له مخې؛ په وروستۍ نښته کې، چې یوې وسله‌والې ډلې غوښتل د چترال د شاه‌سلیم سیمې له لارې د زیباک ولسوالۍ ته ننوځي، لږ تر لږه پېنځه تنه وژل شوي، یو شمېر نور پاکستان ته تښتېدلي او د «آزادۍ جبهې » یو قومندان هم د نښتې او د امنیتي ځواکونو د تعقیبي عملیاتو پر مهال وژل شوی دی.

د بامیان والي د دې ولایت لپاره په کابل کې د ازبکستان د لومړي وزیر له مرستیال جمشید خواجه‌یوف سره په لیدنه کې د اقتصادي همکاریو پر پراختیا، د تلپاتې کرنې پر ودې او د پانګونې پر جلبولو ټینګار وکړ.

د بامیان ولایت د رسنیو دفتر ویلي، په دې لیدنه کې دواړو لوریو د کرنې د ماشیني کېدا، د تخنیکي تجربو د لېږد، د کچالو د صنعت د پراختیا او د بزګرانو د ملاتړ په اړه خبرې کړې دي.

د بامیان والي د ازبکستان له همکاریو د مننې ترڅنګ، د بامیان د کرنیزو او پراختیایي پروژو د ملاتړ غوښتنه هم وکړه.

د ازبکستان لومړي وزیر مرستیال هم د خپل هېواد د همکاریو پر دوام ټینګار وکړ او په بامیان ولایت کې یې د پانګونې، د تولیدي وړتیاوو د پیاوړتیا او د کرنې د سکټور د پراختیا له ملاتړ ډاډ ورکړ.

د یادونې ده، چې دغه پلاوی پرون له غرمې وروسته د دې هېواد د لومړي وزیر د مرستیال جمشید خواجه‌یوف پر مشرۍ کابل ته راغلی او د سفر موخه یې د اسلامي امارت له چارواکو او د افغانستان د خصوصي سکټور له استازو سره لیدنه او په سوداګریز فورم کې ګډون دی.