د ښځو د ژوندانه او حقونو پرمختگونه ماتېدونكي دي- اكسفام او اكشن ايډ

يو شمېر نړيوالې خيريه ټولنې اندېښنه څرگندوي، چې:

له وسله والو مخالفينو سره د سولې خبرې كولى شي، چې په افغا نستان كې د ښځو په اړه د لس كلنو پرمختگونو مخه ونيسي.

دوى وايي، چې:

افغان دولت ښايي سولې ته د رسيدو لپاره د ښځو حقونه قرباني كړي.

له بلې خوا د ولسي جرگې يو شمېرښځينه غړې د دغو خيريه او مرستندويو بنسټونو اندېښنې پر ځاى نه بولي او زياتوي، چې:

سوله بايد د قانون په رڼا كې وشي.

د دوى په وينا:

كه وسله وال مخالفين د افغانستان له نافذه قوانينو پرته او د ښځو حقونو ته د نه پاملرنې په صورت كې سوله غوړاي؛ نو په وينا يي ښځې به يې په وړاندې مقاومت وښيي.

د آريانا راډيو ټلويزيون خبرياله فريده سوما څرگندوي، چې:

د اكسفام او اكشن ايډ په نوم دوه خيريه او مرستندويه بنسټونو د يوه رپوټ په خپرولو په افغانستان كې د ښځو حقونه له خطر سره مخ  نومولي دي.

دوى ويلي، چې:

له يوې خوا نړيوال ځواكونه له افغا نستان څخه په وتلو دي او له بلې خوا افغان حكومت له وسله والو طالبانو سره د سولې خبري كوي؛ نو ښايي يو ځل بيا په دغه هېواد كې ښځې منزوي او حقونه يې تر پښو لاندې شي.

په رپوټ كې راغلي، چې:

په افغا نستان كې د ښځو د ژوندانه او حقونو په اړه ترلاسه شوي پرمختگونه ماتېدونكي دي او روان سياسي حالت ته په كتو د ښځو پرمختگ له نامعلوم برخليك سره مخ كېدونكى دى.

د اكسفام او اكشن ايډ په باور:

كه څه هم په تېرو لس كلونو كې ښځو په سياسي او پوهنيز ډگركې سترې برياوې ترلاسه كړي، خو په وينا يې دغه لاس ته راوړني ماتيدونكې پاتې شوې دي.

د آكسفام موسسې يو سلاكار لويس هنكوك ويلي، چې:

افغا نستان ته بايد واقعي سوله راشي؛ نه داسې سياسي تفاهم، چې د يو شمېر خلكو په گټه وي.

د آكسفام موسسې سلاكارلويس هنكوك وايي:

افغان ميرمنې ماته وايي، چې د خپلو حقونو د دفاع لپاره نشي كولى د سولي د راوستلو پر يوه لوري هم باور وكړي. دوى غواړي، چې پخپله د خبرو پرميز حاضرې وي او له خپلو حقونو خپله دفاع وكړي .

په ولسي جرگه كې يو شمېر ښځينه غړي بيا دغه اندېښنې بې بنسټه بولي او وايي، چې:

سوله د افغان ټولني يوه باارزښته غوښتنه ده، چې بايد ترسره شي.

د ولسي جرگي غړې حبيبه دانش وايي:

په تېرو لس كلونو كې ښځو د پام وړ پرمختگ كړى او دا ناشونې ده، چې افغا نستان دې  بېرته د لس كاله پخوا پېر ته وروگرځي.

د ولسي جرگي غړې رحيمه جامي ټينگار كوي:

كه افغان ميرمنې په دې پوه شي، چې د سولې په پروسه كې د دوى حقونه ترپښو لاندې كيږي؛ نو په وړاندې به يې مقاومت وكړي.

د اكسفام او اكشن ايډ موسسو دغه رپوټ وايي، چې:

په افغانستان كې د پوهنې په برخه كي د نجونو ونډه دېره شوې، خو په دولتي ادارو كې د ښحو ونډه مخ پركميدو ده.

د نوموړي رپوټ د ارقامو له مخې:

په ۲۰۰۶ع  كال كي د دولتي ادارو د ښځو ونډه يو دېرش سله وه، خو اوسمهال دغه فيصدي اتلس ته را ټيټه شوې ده.