سیمه ییز خبرونه
د کابل ـ جلال آباد د دوه يم سړک د جوړولو كار پرانيستل شو
چارواکي وايي دغه سړک، چې له سره رود، خوږیاڼیو، شېرزادو او حصارک ولسوالیو څخه تېریږي یوسل و لس میليون دالر لگښت لري، چې آسیا پراختيايي بانک او جاپان يې د وركړې خبره كوي.
دوی وايي، د دغه سړك چارې به په درې كلونو كې بشپړې شي.
د افغانستان د فواید عامې وزیرنجيب الله اوژن وايي، یاد یوطرفه سړک ۱۰۶کیلومتره اوږدوالى او اوه متره سور لري، چې په پاخه او اساسي توگه جوړيږي.
د مالیې وزیر حضرت عمرزاخیلوالد وايي، دغه پروژه د اقتصادي، امنیتي، ترافیکې او خلکو ته د سهولت له پلوه ډېره مهممه ده او دا ښيي، چې نړیواله ټولنه په راتلوونکې کې هم له افغانستان سره بنسټیزې مرستې کوي.
د ننگرهار والي مولوي عطاالله لودین له حكومته وغوښتل، چې له دغه ولايت سره شوې ژمنې پلي كړي.
د ننگرهار اوسيدونكى ذبیح الله زمری وايي، چې د پروژې كاربايد ژر پيل شي.
یاده دې وي، چې شاوخوا یوه میاشت وړاندې د چارواکو له خوا د کابل- جلال آباد د دوه يم سړک د جوړولو د کار د پیل ډبره کیښودل شوې؛ خو تراوسه یې د کار څرک نه معلومیږي.