د افغانستان بهرنیو چارو وزارت د سیاسي چارو لومړي رییس شعیب بریالي د انډونیزیا د دیني چارو له وزیر او د استقلال جومات له امام، نصیرالدین عمر سره لیدنه کړې ده.

په انډونیزیا کې د افغانستان سفارت د خبرپاڼې له مخې؛ په دې لیدنه کې دواړو لوریو د دوه‌اړخیزو اړیکو د پراختیا، دیني او فرهنګي همکاریو، د دواړو هېوادونو د علماوو ترمنځ د تجربو د تبادلې او د ګډو پروګرامونو او ناستو د جوړولو په اړه خبرې وکړې.

دواړو لوریو همدارنګه د افغانستان او انډونیزیا د دیني بنسټونو ترمنځ د اړیکو پر پیاوړتیا او د ګډو اړیکو او همکاریو پر دوام ټینګار وکړ.

په دې لیدنه کې په جاکارتا کې د افغانستان د سفارت سرپرست، سعدالله بلوچ، هم حضور درلود.

د افغانستان دفاع وزارت یو ځل بیا ټینګار کړی، چې د افغانستان له خاورې نورو هېوادونو ته هېڅ راز ګواښ متوجه نه‌دی او د اسلامي امارت ځواکونه د هېواد له پولو منظمه ساتنه کوي.

دې وزارت زیاته کړې. هیچا ته به د افغانستان له خاورې د هغو ډلو یا کسانو د فعالیتونو لپاره د کار اخیستلو اجازه ورنه‌کړ شي، چې نورو هېوادونو ته ګواښ بلل کېږي.

د دفاع وزارت ویاند صدیق‌الله نصرت ویلي؛ اوس په افغانستان کې یو خپلواک نظام حاکم دی او په هېواد کې هېڅ داسې شخص یا ډله نشته، چې نورو هېوادونو ته ګواښ رامنځته کړي.

هغه ویلي:« د اسلامي امارت پالیسي څرګنده ده او په افغانستان کې یو خپلواک نظام شتون لري. په افغانستان کې هېڅ داسې ډله نشته، چې هېوادونو ته ګواښ وي او اسلامي امارت به هېڅکله د داسې کسانو شتون ته اجازه ورنه‌کړي.»

صدیق‌الله نصرت ټینګار کړی، چې د اسلامي امارت ځواکونه د هېواد په پولو کې منظم ځای پر ځای شوي او هېڅ فرد یا ډلې ته اجازه نه‌ورکوي، چې ناامني رامنځته او یا تخریبي فعالیتونه ترسره کړي.

هغه زیاته کړې:« افغانانو او د سیمې هېوادونو ته ډاډ ورکوو، چې په فرضي کرښو کې سرحدي ځواکونه په منظم ډول خپلې دندې ترسره کوي او هېڅ ډول اندېښنه دې نه‌لري.»

دا څرګندونې په داسې وخت کې راپورته کېږي، چې د سیمې ځینو هېوادونو او همدارنګه د ډله‌ییز امنیت تړون ټولنې وخت ناوخت د افغانستان د پولو د امنیت په اړه اندېښنې څرګندې کړې دي؛ هغه اندېښنې، چې اسلامي امارت له دې مخکې د رهبرۍ پر کچه بې‌اساسه بللې دي.