د امریکا واشنګټن پوسټ ورځپاڼې راپور ورکړی، چې د دې هېواد ولسمشر ډونالډ ټرمپ تېره میاشت د ایران له لوري د ترور د ګواښ له کبله په پوځي الوتکه کې له ترکیې څخه پټ وتلی و.

واشنګټن پوسټ لیکلي: سپینې ماڼۍ هغه مهال ویلي وه، چې ټرمپ له ترکیې څخه په« ایرفورس ون» الوتکه کې وتلی؛ خو د دې ورځپاڼې د څرګندونو له مخې، هغه په انقره کې پخوانۍ« ایرفورس ون» الوتکې ته له ختلو وروسته پټ د خوړو د لېږدولو په یوه موټر کې یوې کوچنۍ C-32A پوځي الوتکې ته لېږدول شوی و.

ټرمپ د ناټو په غونډه کې د ګډون لپاره په هغې نوې الوتکه کې انقرې ته تللی و، چې قطر امریکا ته ډالۍ کړې او تازه بیارغول شوې وه؛ خو له ترکیې څخه د وتلو پر مهال یې له پخوانۍ« ایرفورس ون» الوتکې کار واخیست.

د واشنګټن پوسټ د څرګندونو له مخې، دا کار د ټرمپ پر وړاندې د یوه ګواښ له کبله شوی و.

زړې« ایرفورس ون» الوتکې په دې عملیاتو کې د« تېر ایستونکې الوتکې» رول درلود، چې د ټرمپ تګ پټ پاتې شي.

هغه خبریالان، چې فکر یې کاوه له ټرمپ سره په زړه الوتکه کې سفر کوي؛ د الوتنې پر مهال اړ کړ شول، چې د خبریالانو د برخې د کړکیو پردې تړلې وساتي. ان د سپینې ماڼۍ ځینو کارکوونکي هم نه پوهېدل، چې ټرمپ په الوتکه کې نه‌و.

ټرمپ وروسته د خبریالانو له‌خوا د پردو د تړلو په اړه د پوښتنې په ځواب کې وویل، ښايي هغوی په «یوه خطرناکه الوتنه» کې ول. هغه زیاته کړې:« خو که زه لاړ شم، تاسې هم ځئ، سمه ده؟»

د ټرمپ سپرلۍ C-32A الوتکه د شپې شاوخوا ۱۰:۲۰ بریټانیا ته ورسېده او پخوانۍ« ایرفورس ون» الوتکه څو دقیقې وروسته ورسېده. څرګنده نه‌ده، چې ټرمپ څنګه بېرته پخوانۍ الوتکې ته لېږدول شوی و.

ټرمپ له پخوانۍ الوتکې څخه له کښته کېدو وروسته په بریټانیا کې له مېشتو امریکايي ځواکونو سره وکتل او بیا هغې نوې الوتکې ته ولاړ، چې قطر امریکا ته ډالۍ کړې ده.

سپینې ماڼۍ د دې راپور په غبرګون کې ویلي، نوې الوتکه پر پرمختللیو امنیتي سیسټمونو سمبال ده او د ولسمشر د خوندي ساتلو لپاره د شته ټولو امکاناتو څخه کار اخیستل کېږي.

نوې الوتکه بوینګ ۷۴۷ ده، چې تېر کال قطر امریکا ته ډالۍ کړې او د «ال۳ هېریس ټکنالوژیز» دفاعي شرکت له‌خوا بیا رغول شوې ده.

ټاکل شوې دغه الوتکه لنډمهاله د« ایرفورس ون» پر بڼه وکارول شي؛ تر هغې، چې د امریکا د ولسمشرۍ نوې الوتکې چمتو شي.

د کولمبیا په لویدیځ کې د یوې زورورې زلزلې له کبله ۱۱۱ ډېر کسان وژل شوي او سلګونه نور ټپیان شوي دي.

دا زلزله د دوشنبې پر ورځ د ریښتر پر کچه ۷،۴ درجې زورورې زلزلې د ځمکې په ۱۰۷ کیلومټره ژوروالي کې رامنځته شوې ده. د کولمبیا چارواکي وايي، دا په یوویشتمه پېړۍ کې د دې هېواد د ثبت شوې تر ټولو زوروره زلزله ده.

د کولمبیا ولسمشر «آبلارډو دې لا اسپری‌یلا» د وژل شویو کسانو شمېر لږ تر لږه ۱۱۱ کسان ښودل شوی او څرګندوي، چې د نړېدلو ودانیو له خاورو او ویجاړیو لاندې د بند پاتې کسانو ژغورل د حکومت تر ټولو مهم لومړیتوب دی.

هغه ویلي؛ د خلکو د ژغورلو، له زیانمنو کورنیو سره د مرستې او زیانمنو سیمو ته د بېړنیو مرستو د رسولو لپاره د حکومت ټول امکانات کارول کېږي.

د کالي ښارونو؛ پرېرا او مانیزالس ښارونه له پوره زیانمنو سیمو څخه دي.

په کالي کې چارواکو ویلي، چې ۳۵ کسان وژل شوي او شاوخوا ۷۰۰ نور ټپیان دي.

ژغورونکو او رضاکارانو د دوشنبې تر ماښامه د تندي پر څراغونو د نړېدلو ودانیو په خاورو او ویجاړیو کې د بند پاتې کسانو لټون کاوه. په کالي کې یوه شپږ میاشتنۍ ماشومه او مور یې د یوې پېنځه پوړیزې ودانۍ له خاورو او ویجاړو څخه ژغورل شوي دي.

په پریرا ښار کې هم ژغورونکو د یوه ځوان ژغورلو هڅه کوله، چې د یوې ودانۍ لاندې بند پاتې و. خپرو شویو انځورونو ښودلې، چې په څو ښارونو کې د ودانیو برخې نړېدلي او سړکونه له خاورو او ویجاړیو ډک شوي دي.

د کولمبیا چارواکو د خوندیتوب د ارزونې لپاره په سیمه کې د څو هوايي ډګرونو فعالیتونه هم درولي دي.

همداراز په ځینو ښارونو کې د لوټمارۍ د مخنیوي او امنیت د ټینګښت لپاره ګرځبندیز لګېدلی دی.

د کولمبیا د ځمکپوهنې ادارې ویلي، چې تر اوسه ۲۱ وروستي‌ټکانونه ثبت شوي دي او د نورو ټکانونو د رامنځته کېدا شونتیا هم شته.

کولمبیا د « آرام سمندر په اور کړۍ»  نومې سیمه کې موقعیت لري او هره میاشت په دې هېواد کې زرګونه زلزلې ثبتېږي.

په ۱۹۹۹ز.کال کې هم د کولمبیا د قهوې په کرنیزه  سیمه کې د ریښتر پر کچه ۶،۲ درجې زلزلې له ۱۰۰۰ ډېر کسان وژلي وه.

د سعودي عربستان په پلازمېنه ریاض کې د څوکیو جوړولو په یوه فابریکه کې د اور لګېدو له کبله ۱۶ بنګله‌دېشي کارګر کډوال وژل شوي دي.

د راپورونو له مخې، اور د یکشنبې پر ورځ د ریاض د موسى سنایه په صنعتي سیمه کې لګېدلی دی.

د بنګله‌دېش بهرنیو چارو وزارت ویلي، د پېښې وضعیت څاري او په ریاض کې د دغه هېواد سفارت له سعودي چارواکو سره خپل هېواد ته د مړو د لېږدولو چارې ترسره کوي.

د بهر میشتو د هوساینې او بهرنیو کارونو وزیر عارف الحق چوهدري چارواکو ته لارښوونه کړې، چې خپل مړي ژر تر ژره هېواد ته ولېږدوي او د قربانیانو کورنیو ته اړینې دولتي مرستې او غرامت برابر کړي.

شاوخوا ۳.۵ میلیون بنګله‌دیشیان په سعودي عربستان کې ژوند کوي او دغه هېواد د بنګله‌دېشي کارګرو کډوالو تر ټولو لوی کوربه هېواد دی. دغو کارګرانو تېر کال له سعودي څخه خپل هېواد ته له ۲.۷ میلیارډ ډالرو ډېرې پیسې لېږلې دي.