رویال چلنجرز بنګلور د ۲۰۲۶هند غوره لیګ(ای‌پي‌ال) په پایلوبه کې زړه‌راکښونکې لوبه ترسره کړه او ګجرات ټایټنز ته یې د پېنځه ویکټو پر توپیر ماتې ورکړه.

دغه لوبه د یکشنبې پر ورځ په نریندرا مودي لوبغالي کې ترسره شوه.

بنګلور د ۱۵۶ منډو هدف په ۱۸ آورونو کې د ۵ لوبغاړو پر سوځېدا ۱۶۱ منډې جوړې کړې او د دوه آورونو له پاتې کېدا سره یې اتلولي خپله کړه.

له دې بریا سره رویال چلنجرز بنګلور د ای‌پي‌ال په تاریخ کې له چینای سوپر کینګز او ممبي انډینز وروسته درېیمه لوبډله شوه، چې پرله‌پسې اتلولي ګټي.

د لوبې په پیل کې د بنګلور لوبډلمشر راجات پاټیډار پچه وګټله او د توپ اچونې پرېکړه یې وکړه؛ هغه پرېکړه، چې ژر یې مثبته پایله ورکړه. د بنګلور چټکو او اغېزناکو توپ اچوونکو د ګجرات توپوهونکي تر سخت فشار لاندې راوستل او د ویکټو پرله‌پسې لوېدا ته یې لاره هواره کړه.

جاش هیزلووډ او بهوونشور کومار د شبمن ګېل او سای سدرشن په ژر سوځولو سره ګجرات ته سخت ګوزار ورکړ. وروسته د بنګلور توپ اچوونکو په لنډو توپونو د ګجرات ډېری لوبغاړي وسوځول.

د برید د کرښې له نړېدا سره ـ سره  واشنګټن سندر د ۵۰ ناسوځېدلو منډو پر جوړولو هڅه وکړه، چې خپله لوبډله په سیالۍ کې وساتي او د منلو وړ هدف وټاکي.

راشد خان د ۶ توپونو پر مټ ۱۵ منډې جوړې کړې او د راهول ټېواټیا او جېسن هولډر لنډو؛ خو ګټورو لوبو د ګجرات منډې ۱۵۵/۸ ته ورسولې.

د هدف په ځواب کې بنګلور توپاني پیل وکړ. ویراټ کوهلي او ونکټېش ایر خپلې لوبډلې ته د ای‌پي‌ال د پایلوبو په تاریخ کې تر ټولو چټکې ۵۰ منډې جوړې کړې او یوازې په ۳.۳ آورونو کې یې دغه پړاو بشپړ کړ.

ونکاټش ایر د ۱۶ توپونو پر مټ ۳۲ منډې جوړې کړې او د لوبډلې په چټک پیل کې یې مهم رول ولوباوه؛ خو وروسته محمد سراج وسوځاوه. ورپسې کاګیسو رباډا هم ډیوډټ پډیکال له ډګره بهر کړ او ګجرات ته یې لنډه هیله پیدا کړه.

د ویراټ کوهلي ځلېدونکې لوبې د سیالۍ برخلیک وټاکه. نوموړي د ۴۲ توپونو پر مټ ناسوځېدلې ۷۵ منډې جوړې کړې، خپله نیمه سلیزه یې په ۲۵ توپونو بشپړه کړه او لوبډله یې تر بریا ورسوله.

جیټش شارما هم له کوهلي سره په ډاډمنې لوبې بنګلور هدف ته ورساوه او د دغې لوبډلې مینه‌والو ته یې د اتلولۍ جشن ورپر برخه کړ.

ویراټ کوهلي د لوبې د غوره لوبغاړي جایزه وګټله او رویال چلنجرز بنګلور د هند غوره لیګ دوه‌یمه اتلولي پخپل نوم ثبت کړه.

ټاکل شوې، چې دا سیالۍ د ۲۰۲۶ز.کال د غویي له پېنځلسمې څخه د غبرګولي تر لومړۍ / د می له پېنځمې څخه تر دوه‌ویشتمې پورې د سعودي عربستان پر کوربتوب ترسره شي. په دې سیالیو کې به ۱۶  غوره لوبډلې د اتلولۍ او د نړیوال جام د ګډون د امتیاز ترلاسه کولو لپاره سیالي وکړي.

د سیالیو د جوړښت له مخې؛ له هر ګروپ څخه دوه مخکښې لوبډلې به د کوارټر فاینل پړاو ته لار ومومي او په مستقیم ډول به د ۱۷ کلنو نړیوال جام ته، چې ټاکل شوې په قطر کې ترسره شي؛ د ګډون جواز ترلاسه کړي.

په A ګروپ کې کوربه هېواد سعودي عربستان له تاجکستان، تایلنډ او میانمار سره یوځای دی.

پهB  ګروپ کې جاپان، انډونیزیا، چین او قطر برخه لري.

په C ګروپ کې د سویلي کوریا لوبډله له یمن، ویټنام او متحده عربي اماراتو سره سیالي کوي.

او په D ګروپ کې د تېر پړاو اتل ازبکستان د اسټرالیا، هند او شمالي کوریا تر څنګ حضور لري.

دا سیالۍ د آسیا د ځوانانو پر کچه له مهمو فوټبالي پېښو څخه شمېرل کېږي او تمه ده، چې د وچې نوې راټوکېدلې وړتیاوې په کې وځلېږي؛ هغه سیالۍ، چې تل د استعداد موندونکو او د فوټبال د مینه‌والو پام ځانته رااړوي.

آریانا راډیو ټلویزیون ټینګار کړی، چې د ګروپي پړاو د مهمو لوبو تر څنګ به پایلوبه هم پر ژوندۍ بڼه خپره شي. همدارنګه له مینه‌والو غوښتنه شوې، چې د نورو معلوماتو، مهالوېش او د لوبډلو د خبرونو لپاره د آریانا ټلوېزیون او آریانانیوز ټولنیزې پاڼې وګوري.

د ۲۰۲۶ کال ژمنی اولمپیک د دوشنبې پر ورځ په میلان-کورتی‌نا کې بریالۍ تر سره شو؛ دوه‌اوونیزې ستونزمنې سیالۍ، ولوله‌ییزې بریاوې او پر واوره او یخ له ځلېدا ډکې هڅې نندارې ته وړاندې شوې.

ناروې له ۱۸ سرو زرو مډالونو او په ټوله کې د ۴۱ مډالونو پر ګټلو په لښتیلیک(جدول) کې لومړی مقام خپل کړ او پر ژمنيو سپورټونو یې ځانګړې واکمني ټینګه کړه.

امریکا د سرو زرو له ۱۲مډالونو او په ټوله کې د ۳۳ مډالونو پخپلولو دوه‌یم مقام ترلاسه کړ، چې پر وروستۍ ورځ یې د اضافي وخت له برکته د نرینه‌وو یخ هاکي پر بریا ترسره کړه.

کوربه هېواد د ژمني اولمپیک په تاریخ کې د ۳۰ مډالونه پر ګټلو مینه‌وال خوښ کړل.

دغه راز هالینډ هم د ۲۰ مډالونو او د چټک سکیټینګ په برخه کې د پام وړ هڅه نندارې ته وړاندې کړه.

جرمني، فرانسې، سویډن، جاپان او نورو هېوادونو د مډال په لښتیلیک کې ستونزمنې سیالي رامنځته کړې؛ دا یې وښودله، چې ژمني سپورټونه پر نړیواله کچه ورځ تر بلې ژوریږي او د سیاليو ډګر پراخوي.

د ۹۲ هېوادونو لوبغاړو د میلان-کورتی‌نا په لوبو کې ګډون درلود، چې ورسره د تجربه لرونکو اتلانو او ځوانو راڅرګندیدونکو استعدادونو زړه‌راکښونکی جوړښت نندارې ته وړاندې شو.