تازه خبرونه
زلمي خلیلزاد د افغانستان لپاره د ملګرو ملتونو د ځانګړي همغږي کوونکي له ټاکلو هرکلی وکړ
د افغانستان د سولې په چارو کې د امریکا پخواني ځانګړي استازي زلمي خلیلزاد د ملګرو ملتونو د عمومي منشي لخوا د افغانستان په چارو کې د ځانګړي همغږي کوونکي او خپلواک مفتش له ټاکل کېدو هرکلی کړی دی.
د ملګرو ملتونو د عمومي منشي دفتر د سې شنبې پر ورځ (د غویی پر پېنځمه) په ډاګه کړه، چې سینیرلي اوغلو د دې ټولنې د امنیت شورا د ۲۶۷۹ پرېکړه لیک پر بنسټ د دغه مقام لپاره غوره شوی دی.
په خبرپاڼه کې راغلي، چې د ملګرو ملتونو عمومي منشي له هغه غوښتي، چې د افغانستان د وضعیت د خپلواکې ارزونې مشري وکړي او د افغانستان پر وړاندې د شته ننګونو د حل لپاره د یوې اړوندې او همغږې تګلارې په اړه وړاندیزونه وکړي.
د افغانستان د سولې په چارو کې د امریکا پخواني ځانګړي استازي زلمي خلیلزاد نن (چارشنبه د غویی شپږمه) په یو لړ تویتونو کې د فریدون سینیرلي اوغلو ټاکل یو ښه انتخاب وباله او ویې ویل، چې اوغلو یو تجربه کاره دیپلومات دی.
هغه زیاته کړې: اوس درې نورو ګامونو ته اړتیا ده: په دوحه کې د می پر لومړۍ ناستې ته، چې د ملګرو ملتونو د عمومي منشي پر کوربتوب ترسره کیږي؛ باید له افغانستان سره د بین الافغاني خبرو اترو لپاره د لارې نقشه چمتو کړي. دا ډول عمل به د سفیر (اوغلو) ماموریت ځانګړی کړي. د دوحې په کنفرانس کې باید له طالبانو ( اسلامي امارت) سره د دوحې د تړون د بشپړ تطبیق په اړه د هغوی د ژمنو د معلومولو لپاره غونډه وشي.
د خلیلزاد د څرګندونو له مخې، ده پر وار وار ویلي، چې د دوحې د هوکړې د عملي کېدو لپاره تر ټولو ښه انتخاب د خلکو اقدامات دي. هغه په دې باور دی، چې د سینیرلي اوغلو لپاره دا مهمه ده، چې په دې غونډه کې ګډون وکړي.
تر اوسه د افغانستان اسلامي امارت د ملګرو ملتونو د عمومي منشي لخوا د افغانستان په چارو کې د ځانګړي همغږي کوونکي او خپلواک مفتش د ټاکلو په اړه کوم غبرګون ندی ښودلی.