تازه خبرونه
طالبانو په میدان وردګ کې ۲۸ ملکي وګړي تښتولي – پولیس
د میدان وردګ پولیسو ويلي، چې وسلوالو طالبانو په دې ولایت کې لږ تر لږه ۲۸ ملکي وګړي تښتولي دي.
د میدان وردګ امنیه قومندانۍ په ډاګه کړې، چې طالب جنګیالیو نن سهار د جلریز ولسوالۍ د سیاه پیتاب او پُل مهراب په اړوند سیمه کې ملکي موتر ودرول او ۲۸ ملکي وګړي یې ترې له ځان سره یوړل.
د پولیسو په وینا، د حصه اول بهسود د ولسوالۍ مسافر د کابل پر لوري روان ول.
پولیسو د دې کسانو د برخلیک په اړه نور جزئیات ندي ورکړي.
طالبانو تر دې دمه په دې اړه څه ندي ویلي؛ خو هغه سیمه، چې دا پېښه په کې رامنځته شوې د طالبانو تر څارنې لاندې ده.