تازه خبرونه
طالبانو انځوریزې، غږیزې او چاپي رسنۍ پر پوځي بریدونو ګواښلي
د طالبانو نظامي کمیسیون دغه له ګواښه ډکه اعلاميه څرګندوي، چې یو شمېر رسنۍ له امنیتي بنسټونو څخه د پيسو اخيستو په بدل کې داسې سوداګريز اعلانونه خپروي، چې د (طالبانو او جهادي ارزښتونو) سپکاوی په کې وي او عام خلک د طالبانو پر ضد جګړو، پاڅون او بېزارۍ ته لمسوي.
د طالبانو دا هم څرګنده کړې، چې حکومتي بنسټونه له دغو رسنیو څخه استخباراتي ګټه پورته کوي.
د طالبانو په دې خبرداري کې راغلي، چې که رسنۍ د دغو اعلانونو له خپرولو ډډه ونکړي، د دوی پر مرکزونو سربېره به یې په ولايتونو او مرکزونو کې هم خبریالان او پرسونل هیڅ راز خونديتوب ونلري.
د رسنیو ملاتړ بنسټونه وایي، هیڅ ډله نشي کولی رسنیو ته حد وټاکي او په وینا یې طالبان دې خپل ګواښ بېرته واخلي.
د افغانستان آزادو رسنیو د ملاتړ بنسټ رییس مجیب خلوتګر وایي، چې حکومت د رسنیو او خبریالانو د امنیت ساتونکی دی. که له یوې اوونۍ وروسته کومه ستونزه رامنځته شي؛ نو حکومت ته به د مسوولیت لومړنۍ ګوته ونیول شي.
که څه هم څو کاله کیږي، چې رسنۍ د امنیتي بنسټونو اړوند اعلانونه خپروي؛ خو دا لومړی ځل دی، چې طالبان رسنیو ته د دې اعلانونو د دریدو ګواښ کوي او دا ګواښ داسې مهال کیږي، چې د سولې خبرې خپل پنځ(اوج) ته رسیدلې دي.
د خبریالانو او رسنیزو بنسټونو د فدراسیون رییس فهیم دشتي ویلي، چې هیڅ ډله نشي کولی رسنیو ته حد وټاکي؛ ځکه رسنۍ د افغانستان د نافذه قوانینو په چوکات کې هڅې تر سره کوي.
د چارو څارونکي وايي، چې دغه اعلانونه نه یوازې له تخنيکي پلوه کمزوري دي، بلکې تر ډېره تبليغاتي بڼه لري، چې له واقعتونو سره په کې واټن لیدل کیږي.