تازه خبرونه
طالبان د دوحې د نهم پړاو خبرو له پرمختګه خبر ورکوي
له امریکایانو سره د طالبانو د مرکچي پلاوي مشر شیر محمد عباس ستانکزي آریانا نیوز ته په خبرو کې ویلي؛ د بهرنیو ځواکونو د وتلو مسله ډېره مهمه ده، چې پوره پاملرنه غواړي.
هغه د یوې پوښتنې په ځواب کې څرګنده کړې؛ طالبان نه یوازې په افغانستان کې ، بلکې د نړۍ په هر هېواد کې د ملکي تلفاتو غوښتونکي ندي . زمونږ هیله داده، چې په افغانستان کې دا اوږده جګړه نوره پای ته ورسیږي.
دغه راز په قطرکې د طالبانو د مرکچي پلاوي غړي او ویاند سهیل شاهین په افغانستان کې د امنیت بشپړ ډاډ هم څرګند کړی او وایي، چې د افغانستان د سولې په اړه له امریکایي پلاوي سره په روانو خبرو کې پرمختګ رامنځته شوی او مشورې هم تر سره شوې دي.
د افغانستان حکومت هم دغو خبرو ته هیله من شوی دی.
د ولسمشر ویاند صدیق صدیقي ویلي، چې لدې خبرو وروسته به د حکومتي پلاوي خبرې رامنځته شي.
که څه هم ښکېل اړخونه له پرمختګونو خبرې کوي؛ خو د روانو خبرو بشپړ جزئیات تر دې دمه په ډاګه شوي ندي.