سیمه ییز خبرونه
غزني به ۲۰۱۳ كال د اسلامي هېوادونو د تمدن او فرهنگ پلازمينې لقب ته چمتو نشي
د غزني يو شمېر اوسېدونكي او فرهنگيان د لرغونو آثارو د بيا رغاونې كارونه بي كېفېته بولي. د دوى په وېنا د غزني د پخواني ښار يو څلى، چې تېر كال نړېدلى وو، د بيا رغاونې په حال كې بيا را ونړېد، خو د غزني د اطلاعاتو او فرهنگ رئيس وايې، دا څلى نړېدلى نه دى، بلكې د بيا رغاونې په پروسه كې د ځينو نيمگړتياو له امله دوى ويجاړ كړ.
د غزني ښار يو شمېر اوسېدونكي دې ته اندېښمن دي، چې په لنډه موده كې به د دوى ولايت د ۲۰۱۳ كال لقب ته چمتو نه شي.
په پام كې ده په دې كال كې غزني د اسلامي هېوادونو د تمدن او فرهنگ د پلازمينې په توگه ونومول شي.
غزني ښاريان وايې، كه په پخواني ښار كې د اطلاعاتو او فرهنگ رياست يو څلى نړولى وي، د بيا رغاونې په پروژو كې د ټيټ كيفيت كارونو څرگندونه كوي.
خو د غزني د اطلاعاتو او فرهنگ رئيس حميدالله سروري وايې:
د لرغونو آثارو د بيا رغاونې چاره د فني او مسلكي انجنيرانو تر څار لاندې پر مخ ځي.
په همدې حال كې په ولسي جرگه كې د غزني استازي خدا داد او علي اكبر قاسمي هم د ۲۰۱۳ كال مراسمو ته د غزني د نه چمتو كېدو په باب اندېښنې لري.
دا په داسې حال كې ده، چې ۲۰۱۳ كال ته هم د گوتو په شمېر ورځې پاته دي.