بی بی سی پښتو
فرانسه کې وسلوال درې پولیس ووژل
فرانسه کې یوه وسلوال هغه درې پولیس په ډزو ووژل چې د کورني تاوتریخوالي د کنټرول لپاره سیمې ته تللي وو.
دې پولیسو هڅه کوله له هغې ښځې سره مرسته وکړي چې د چارشنبې ورځې لومړیو کې د کور بام ته ختلې وه.
پېښه د منځنۍ فرانسې په سن ژوست ښار کې شوې ده.
وسلوال پر پولیسو ډزې وکړې چې پایله کې یې یو پولیس ووژل او بل ټپي شو.
وروسته یې کور ته اور واچاوه او دوه نور پولیس یې هم ووژل.
څلورم پولیس هم دې پېښه کې ټپي شوی، خو ښځه ژغورل شوې ده.
- پر فرانسه او ایټالیا “الیکس” توپان راغلی
- یوې ښځې څنګه ټوله فرانسه کې مظاهرې پیل کړې؟
- کورونا وبا: فرانسه کې د مړو شمېر له لس زرو زیات شو
د فرانسې ولسمشر ایمانوېل مکرون وايي ټول ملت د پولیسو له کورنیو سره غم او درد کې شریک دی.
نوموړی خپل ټوېټر کې زیاتوي: “امنیتي ځواکونو د ولسي خوندیتوب لپاره ځانونه خطر کې واچول دوی زموږ اتلان دي.”
د فرانسې لومړي وزیر هم د پېښې قربانیانو سره خواشیني ښيي او وايي: “نننۍ پېښې ټول هېواد اغېزمن کړ.”
پولیسو د دې ۴۸ بریدګر مړی هم د پېښې ځای کې موندلی چې د خپل اولاد د کورني توقیف له امله چارواکو پېژاند.
د سن ژوست ښاروال وايي، دا کور یو مخ سوځېدلی دی.
لومړیو کې ویل کېدل چې ممکن دا وسلوال په تېښته بریالی شوی وي، ځکه پولیسو لټون پیل کړ.
هغه مهال امنیتی سرچینو ځايي رسنیو ته ویلي باوري دی چې وسلوال تښتېدلی دی، مګر وروسته یې مړی وموندل شو.
