تازه خبرونه
له اسلامي امارت سره تعامل ته اړتیا ده – سرګی لاوروف
د روسیې د بهرنیو چارو وزیر سرګي لاوروف له نړیوالې ټولنې غوښتي، چې د افغانستان له اسلامي امارت سره خبرې وکړي؛ ځکه، چې طالبان( اسلامي امارت ) د افغانستان یو حقیقت دی.
سرګي لاوروف امريکا ته له خپل سفر وروسته په نيويارک کې له خبريالانو سره په خبرو کې څرګنده کړې: مونږ ګومان کوو، چې طالبان( اسلامي امارت) يو واقعيت دی. له دوی سره د ځمکې پر سر خبرې اړینې دي.
هغه دا هم ویلي؛ مونږ تر هغې د افغانستان اوسنی لنډمهالی حکومت پر رسمیت پېژندلی نهشو، چې خپلې ژمنې او همدارنګه د نړیوالې ټولنې غوښتنې یې پلې کړې نهوي او همدارنګه یوه ټولګډونه سیاسي جوړښت یې نه وي رامنځته کړی. دا سمه ده، چې طالبان وايي د دوی دولت د تاجک ازبک او هزاره څخه جوړ شوي دی؛ خو بیا هم له نړیوالو سیاسي معیارونو سره برابر نهدی او نړیوال دوی د همدې لپاره پر رسمیت نهپېژني.
لاوروف زیاته کړې: د نړیوالو د پېژندلو لپاره د نورو معیارونو په منځ کې د نجونو او ښځو د حقونو په ګډون اساسي بشري حقونه هم ذکر شوي دي.
هغه دا هم ویلي؛ مسکو په دې نظر دی، چې لویدیځ باید له خبرو ډډه ونهکړي؛ ځکه په افغانستان کې شل کاله پاتې دي او د افغانستان له اوسني بشري وضعیت څخه د وتلو یواځنۍ لار داده، چې طالبانو سره خبرو ته دوام ورکړو.
لاوروف په ورته وخت کې ویلي، مسکو د مې په لومړۍ نېټه په دوحه کې د افغانستان لپاره د ځانګړي استازې د غونډې د جوړېدو ملاتړ کوي، چې د ملګرو ملتونو د سرمنشي انتونیو ګوترش پر کوربتوب جوړیږي.
دا څرګندونې په داسې حال کې کیږي، چې اسلامي امارت تل ویلي، چې د یوه مشروع حکومت په توګه یې د رسمیت پېژندلو ټول شرایط پوره کړي؛ خو نړیواله ټولنه په دې قضیه کې د پلمې په لټه کې ده. اسلامي امارت اوس هم د ټولګډونه حکومت رامنځته کول او د بشري حقونو مسایل د افغانستان داخلي مسایل ګڼي او له هېوادونو یې غوښتي، چې د افغانستان په داخلي مسایلو کې لاسوهنه ونهکړي.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
سوداگري5 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
په ننګرهار کې د ناکامورا کانال پروژه بشپړه شوه