د افغانستان اسلامي امارت ټینګار کړی، چې د افغانستان د هوايي ډګرونو د پرانیستلو په اړه له ترکیې او قطر سره خبرې نه درېدلي او نه هم په کې ځنډ پېښ شوی دی.

په قطر کې د اسلامي امارت د سیاسي دفتر ویاند محمد نعیم اناتولیا خبري آژانس ته ویلي؛ له عربي متحده اماراتو سره لاسلیک شوی تړون د کابل، کندهار او هرات په هوايي ډګرونو کې د ځمکنیو ترانسپورتي خدمتونو لپاره دی، چې چارې به یې په یو نیم کال کې پای ته ورسیږي.

نعیم ویلي، دا تړون له هغه شرکت سره لاسلیک شوی، چې د اسلامي امارت له واک ته رسېدو مخکې یې د هوايي ډګر چارې سمبالولې او د هوايي ډګر د عملیاتو بهیر نه رانغاړي.

تېره ورځ اسلامي امارت د اماراتو د ګاک نومي شرکت سره د افغانستان د درې هوایي ډګرونو د مدیریت په موخه هوکړه اعلان کړې وه.

د قطر د بهرنیو چارو وزارت د جنورۍ پر ۲۷ د ترکیې او اسلامي امارت له لنډمهالي حکومت سره د کابل د هوايي ډګر د مدیریت او عملیاتو په اړه په یو لړ مهمو موضوعاتو هوکړه شوې وه.