د افغانستان لپاره د امریکا پخواني ځانګړي استازي زلمي خلیل‌زاد ویلي، چې افغانستان د سترو نړیوالو پانګونو د جذب لپاره چمتو دی او د سعودي عربستان له نفت او ګاز شرکت سره نوی تړون د هېواد د اقتصاد لپاره یو مثبت پرمختګ بلل کېږي.

خلیل‌زاد په کابل کې د افغانستان د کانونو وزارت او سعودي دلتا شرکت ترمنځ د تړون د لاسلیک په مراسمو کې ویلي، چې دغه تړون ښيي؛ افغانستان تر بل هر وخت ډېر د سوداګرۍ او سترو پانګونو لپاره چمتو شوی دی.

هغه زیاته کړې، چې افغانستان له ډېره وخته راپدېخوا د منځنۍ آسیا د پراخو سرچینو او د سویلي آسیا د لویو او مخ پر پراختیا بازارونو ترمنځ د یوه ځمکني پُل په توګه مطرح شوی دی.

د خلیل‌زاد د څرګندونو له مخې؛ افغانستان پخپله هم د پام وړ طبیعي سرچینې لري، چې د سیمې او نړیوالو بازارونو اړتیاوې پوره او د هېواد د اقتصادي ودې لپاره نوي فرصتونه رامنځته کولی شي.

خلیل‌زاد دغه تړون« مثبت او هیله‌بښونکی پرمختګ» بللی او څرګندوي، چې افغانان له څو لسیزو جګړو وروسته اوس له پراخو اقتصادي اړتیاوو سره مخ دی.

هغه دواړو لوریو ته د دغه تړون له کبله مبارکي ورکړې او خوښ دی، چې د افغانستان د پانګونې د راتلونکي لپاره د یوه اړین پرمختګ شاهد و.

د یوناما د سیاسي برخې مسوول سکاټ سمیټ د اسلامي امارت د ریاست الوزراء د دفتر یه رییس عبدالواسیع خادم سره د لیدنې پر مهال ويلي، چې په تېرو څو کلونو کې د اسلامي امارت او یوناما ترمنځ ښه همغږي او همکاري رامنځته شوې او د افغانستان لپاره د یوناما د ماموریت پرله‌پسې غځېدا د دې همکاریو ښه نښه ده.

نوموړي د اسلامي امارت له مشرتابه څخه د تورخم له لارې افغانستان ته د زر کانټینره خوراکي توکو او درملو د لېږد لپاره د آسانتیاوو برابرولو له کبله مننه کړې او څرګندوي، چې که دغه خوراکي توکي او درمل پر وخت افغانستان ته نه وای لېږدول شوي؛ له منځه به تللي وای.

سکاټ سمیت ویلي، یوناما د افغانستان د نړیوالې ټولنې له هېوادونو سره د اړیکو د پیاوړتیا لپاره کار کوي او ټینګار یې کړی، چې موجود سیاسي ثبات باید وساتل شي او د افغانستان د اقتصاد د ښه کېدا لپاره ګډو هڅو ته دوام ورکړ شي.

هغه وړاندیز کړی، چې د افغانستان د غږ او غوښتنو د ښه رسولو لپاره دې د اسلامي امارت او ملګرو ملتونو ترمنځ یو ګډ میکانیزم رامنځته شي، چې کله ناکله رامنځته شوې ستونزې د همغږۍ له لارې مناسبې حل شي.

د ریاست‌الوزراء مقام د عمومي دفتر رییس ملا عبد‌الواسع په دې لیدنه کې د یوناما له هڅو او فعالیتونو د ستایلو ترڅنګ ډاډ څرګند کړ، چې اسلامي امارت به له یوناما سره خپلې همکارۍ روانې ساتي.

عبد‌الواسع خادم د ملګرو ملتونو له نورو اړوند ادارو وغوښتل، چې اړمنو افغانانو او د طبیعي پېښو زیان‌منو شویو کسانو ته خپلې مرستې زیاتې او دې برخې ته لومړیتوب ورکړي.

نوموړي همداراز ویلي، په افغانستان کې د امنیت، ثبات او رامنځته شویو اقتصادي فرصتونو په پام کې نیولو سره؛ یوناما باید د افغانستان شته واقعیتونه نور هم وځلوي.

د ملګرو ملتونو سرمنشي له اسلامي امارت څخه غوښتي، چې پر ښځو او نجونو لګېدلي ټول محدودیتونه لرې کړي او په ټولو برخو کې د هغوی د بشپړ، برابر او معنا لرونکي ګډون حقونه خوندي کړي.

دې ټولنې له اسلامي امارت څخه غوښتي، چې په ملګرو ملتونو کې د افغان ښځو پر کار بندیز سمدستي لرې کړي او په ټول هېواد کې دې د ملګرو ملتونو ودانیو ته د هغوی خوندي او بې‌خنډه لاسرسی تضمین کړي.

د ملګرو ملتونو سرمنشي ویلي، د ملګرو ملتونو ټولو کارکوونکو ته خپلو کاري ځایونو ته بې‌خنډه لاسرسی او زیان‌منو خلکو؛ ښځو او نجونو، ته د مرستو رسول ډېر اړین دي.

هغه ویلي؛ ښځو ته د دې زمینه برابرول، چې ښځو او نجونو ته بشري مرستې او اړین خدمتونه ورسوي، د اغېزمن او اصولي بشري غبرګون لپاره یوه اړتیا ده.

د ملګرو ملتونو د سرمنشي د ویاند سټېفان ډوجاریک د څرګندونو له مخې؛ د سپټمبر اوومه هغه ورځ ده، چې کال مخکې افغان ښځې په ټول هېواد کې د ملګرو ملتونو ودانیو ته له ننوتلو منع شوې.

نوموړي ویلي، پر افغان ښځو او نجونو لګېدلي محدودیتونه د هغوی د ژوند پر ټولو برخو اغېز کوي او په عامه ژوند، زده‌کړو او د کار په ډېرو برخو کې د هغوی د بشپړ ګډون مخنیوی مخنیوی دی.

د ملګرو ملتونو سرمنشي ویلي، دغه محدودیتونه د افغانستان د اقتصادي پراختیا، ثبات او له نړیوالې ټولنې سره د بېرته یوځای کېدا پر وړاندې هم جدي خنډ دي.

ویل کیږي، چې د ملګرو ملتونو ودانیو ته د افغان ښځو د لاسرسي محدودول افغانانو ته د ژغورنې او نورو مرستو د رسولو وړتیاوې کمزورې کوي.