سیمه ییز خبرونه
مشرانو جرگې د ښځو نړيواله ورځ ونمانځله
مشرانو جرگې د ځانگړيو مراسمو په ترڅ كې د مارچ اتمه، چې د ښځو نړيواله ورځ ده ونمانځله.
په مشرانو جرگه كې د ښځو د نړيوالې ورځې په مناسبت جوړو شويو مراسمو كې د مشرانو جرگې رييس فضل الهادي مسلميار وويل، چې:
ښځو ته په كار ده، چې خپلو حقوقو ته د رسيدو لپاره په قرآن كريم او نبوي احاديثو منگولې ټينگې كړي. اسلام سلگونه كاله مخكې د ښځې او نارينه د ژوند او حقوقو په اړوند سپارښتنې كړي دي.
ښاغلى فضل الهادي مسلميار وايي، چې:
د نارينه او ښځو حقوق په اسلام كې روښانه دي او خپلو حقوقو ته د رسيدو لپاره په كار ده ، چې په شريعت او نبوي احاديثو عمل وشي. په اوسنيو شرايطو كې د افغان دولت وسلوال مخالفين د ښځو زياتره حقوق تر پښو لاندې كوي.
په دغو مراسمو كې بيات بنياد يو شمېر ښځو ته د گلانو گېډۍ او نغدي پيسې ډالۍ كړې، چې مشرانو جرگې رييس او غړيو وستايه.
بيات بنياد د افغانستان په بېلابېلو ولايتونو كې بيخبنايي پروژې بشپړې كړي، چې روغتونونه ، ښوونځي او وړكتونونه يې د يادولو وړ برخې دي.
د ښاغلي احسان الله آرينزي په وينا، د مور و ماشوم هوساينه او د ژوندانه ښوالى د بيات بنياد موخه ده.
د يادونې وړ ده، چې مشرانو جرگې هم هغو ميرمنو ته، چې د ملي شورا خدماتي چارې تر سره كوي ډالۍ وركړ شوې.