د کندهار ولایت د سوداګریز پلاوي مشر او د افغانستان او ایران د ګډې سوداګرۍ خونې رییس حاجي کمال‌الدین توحید؛ د ایران او افغانستان د ګډې سوداګرۍ خونې له رییس محمود سیادت او د دغې خونې د مدیره پلاوي له یو شمېر غړیو سره د افغانستان په مشهد کې د دې هېواد د جنرال قونسل مفتي نورمحمد متوکل په حضور کې بحث او خبرې کړې دي.

په دې لیدنه کې د دواړو هېوادونو ترمنځ د سوداګریزو او اقتصادي راکړو ورکړو پر پراختیا او آسانتیاوو، په بندرونو او سرحدي لارو کې د آسانتیاوو پر زیاتولو، د بهرنیو اسعارو د ژمنو د پوره کولو پر وړاندې د شته ستونزو، د باروړونکو موټرو چلوونکو ته د ویزو د ورکړې، په ایران کې د افغان باروړونکو موټرو د تګ راتګ د آسانولو او د ګډې پانګونې د پراختیا په اړه خبرې شوې دي.

د کندهار د سوداګریز پلاوي مشر د دغه ولایت او د افغانستان په نورو اقتصادي برخو کې د پانګونې فرصتونه او وړتیاوې ورپېژندلي او د ایراني سوداګرو او پانګه‌والو د پانګونې پر راجلبولو یې ټینګار کړی دی.

نوموړي د افغانستان د صنعت او سوداګرۍ وزارت له‌خوا د اعلان شویو پانګونې فرصتونو ته په نغوته کې د دواړو هېوادونو ترمنځ د اقتصادي او سوداګریزو همکاریو د پراختیا او د خصوصي سکټور د فعالیتونو لپاره د لازمو آسانتیاوو پر برابرولو هم خبرې کړې دي.

ویل کیږي، چې دواړو لوریو د وړاندې شویو موضوعاتو پر څارنه، د دواړو هېوادونو د اقتصادي بنسټونو ترمنځ د همغږۍ پیاوړتیا او د سوداګریزو خنډونو لرې کولو، د اقتصادي راکړو ورکړو آسانولو او د سوداګرۍ او پانګونې د اړیکو پراختیا لپاره ګډې همکارۍ ټینګار کړی دی.

د پنجشېر سیمه‌ییزو چارواکو ويلي، په دې ولایت کې د دودیزې زروینځنې بهیر پیل شوی او په لومړي پړاو کې شاوخوا زر کسانو ته د کار زمینه برابره شوې ده.

د پنجشېر والي محمدآغا حکیم ویلي، دغه بهیر د اسلامي امارت د مشر د« ترحم» له مخې د ځايي اوسېدونکو د ملاتړ او د کاري فرصتونو د برابرولو پر نیت پیل شوی دی.

د پنجشېر والي زیاته کړې؛ اوس‌مهال شاوخوا زر کسان پر دودیزه زروینځنه بوخت دي؛ خو د پرمختللو ماشینونو او وسایلو کارول تر هغه وخته اجازه نه‌لري، چې قانوني پړاوونه بشپړ او د کانونو او پټرولیم وزارت لارښوونې صادرې شي.

دغه راز د پنجشېر د کانونو او پټرولیم ریاست ويلي؛ د زروینځنې قانوني کړنلاره توشیح شوې او دغه ریاست د کانونو او پټرولیم وزارت رسمي لارښوونې ته پر تمه دی، چې د ټاکل شویو معیارونو له مخې او د ځانګړو وسایلو پر کارولو د سرو زرو راایستنه پیل کړي.

د پنجشېر یو شمېر اوسېدونکو هم له دې هڅې هرکلی کړی او څرګندوي، د دودیزې زروینځنې لپاره د کار زمینه برابرېدل کولی شي د کاري فرصتونو په رامنځته کولو او د کورنیو د اقتصادي وضعیت په ښه کېدو کې مرسته وکړي.

له دې مخکې په پنجشېر کې د سرو زرو راایستل منع ول؛ خو اوس د دغه ولایت اوسېدونکو ته اجازه ورکړ شوې، چې په دودیزه توګه او پر لاس زروینځنه او د سرو زرو راایستنه وکړي.

د افغانستان او ایران د ګډې سوداګریزې خونې مشر الحاج کمال‌الدین توحید ایران ته په خپل سفر کې د خراسان رضوي ولایت له اقتصادي مرستیال جمشیدي سره لیدلي دي.

په دې لیدنه کې د ایران او افغانستان د سوداګرۍ خونې مشر محمود سیادت او د کندهار د صنایعو او کانونو خونې مشر سید سرور اماني هم ګډون درلود.

د افغانستان او ایران د ګډې سوداګریزې خونې مشر په دې لیدنه کې د دواړو هېوادونو( کندهار او خراسان رضوي ولایتونو) ترمنځ د سوداګریزو او اقتصادي اړیکو پر پراختیا ټینګار کړی او د خراسان رضوي ولایت اقتصادي پلاوي ته یې کندهار ته د سفر بلنه ورکړې ده.

په دې ناسته کې د دواړو ولایتونو د اقتصادي، صنعتي او سوداګریزو فرصتونو ترڅنګ، د قیمتي ډبرو او کرنیزو محصولاتو د پروسس په برخو کې د ګډې پانګونې پر فرصتونو هم خبرې شوې دي.