هندي پانګوالو ته د مالیې معافیت، ټیټه تعرفه او وړیا ځمکه د افغانستان ځانګړی وړاندیز دی

د افغانستان صنایعو او سوداګرۍ وزارت ویلي، چې د هندي پانګوالو د پانګې د راجلبولو او هڅولو لپاره یې د مالیې معافیت، ټیټه تعرفه او وړیا ځمکه وړاندیز کړې ده.

د صنعت او سوداګرۍ وزیر نورالدین عزیزي د جمعې پر ورځ په نوي ډیلي کې له هندي سوداګرو سره په ګډه غونډه کې هندي شرکتونو ته بلنه ورکړه، چې د افغانستان په بېلابېلو سکټورونو کې پانګونه وکړي.

دا غونډه د هند د سوداګرۍ او صنایعو خونې په همکارۍ ترسره شوه او د افغانستان د صنایعو او سوداګرۍ وزیر ټینګار وکړ، چې افغانستان د کانونو، کرنې، روغتیا او درمل جوړولو، معلوماتي ټکنالوژۍ، انرژۍ او ټوکر په برخو کې د ګډې همکارۍ لپاره پراخه وړتیا لري.

د بهرنیو پانګوالو لپاره سترې هڅونې

نورالدین عزیزي د هڅونې لپاره د لاندې برخې وړاندیز وکړ:

پر اومو توکو او ماشینونو ۱ سلنه تعرفه

د صنعتي پروژو لپاره وړیا ځمکه

کارخونو ته د دوامداره برښنا رسول

د نویو صنایعو لپاره د پېنځه کلنې مالیې معافیت. په ځانګړي توګه هغو صنایعو ته، چې د راستنېدونکو مهاجرینو له‌خوا رامنځته کیږي.

هغه افغان هندو او سکهـ سوداګرو ته هم بلنه ورکړه، چې د افغانستان په بازار کې بیا فعال حضور ومومي. هغه وایي: حکومت هڅه کوي د سوداګرۍ لپاره خوندي، جامع او مناسب چاپېریال چمتو کړي.

د کابل- نوي ډیلي اقتصادي اړیکو پیاوړتیا

د افغانستان او هند ترمنځ اوسنی سوداګریز ارزښت شاوخوا ۱ میلیارډ ډالر اټکل شوی او دواړو خواوو هوکړه کړې، چې سوداګریزې همکارۍ په لاندې برخو کې پراخه کړي:

د دواړو هېوادونو په سفارتونو کې د سوداګریزو اتشو ګومارل

د سوداګرۍ، صنعت او پانګونې په اړه د ګډ کاري ګروپ بیا فعالول

دغه راز د هند حکومت اعلان کړی، چې د کابل- ډیلي او کابل- امرتسر د هوايي کارګو دهلیز فعال شوی او کارګو الوتنې به “ډېر ژر” پیل شي.

د هند بهرنیو چارو وزارت وزیر ام. آنند پراکاش ویلي: “دا به د سوداګرۍ اړیکې د پام وړ زیاتې او د دواړو هېوادونو ترمنځ سوداګریزې اړیکې نورې هم پیاوړې کړي.”

ویل کیږي، چې د اقتصادي همکارۍ د ودې لپاره د دواړه هېوادونو امکانات ډېر پراخ دي.