تازه خبرونه
هېواد ته له پاکستان څخه څه باندې ۳۰۰ افغان کډوال راستانه شول
د کډوالو او راستنیدونکیو چارو وزارت ويلي، چې د سې شنبې پر ورځ ( د غویی ۱۲) ۳۴۳ افغان کډوال له پاکستان څخه د کندهار ولایت د سپین بولدک له لارې هېواد ته راستانه شول.
د دغه وزارت د څرکګندونو له مخې د دوشنبې پر ورځ هم د سپین بولدک له لارې ۲۱۱ افغان کډوال هېواد ته راستانه شوي دي.
د سپین بولدک د مهاجرینو د ریاست د څرګندونو له مخې، د دوشنبې پر ورځ د پاکستان د کراچۍ ښار له زندانونو څخه د ۵۵ کسانو په ګډون ۲۴ کورنۍ، چې ۲۴ یې ماشومان دي هم راخوشې او هېواد ته راستانه شول.
دغه وزارت دوه ورځې وړاندې هم ویلي وه، چې د کندهار د سپین بولدک له لارې ۱۲۰ افغان کډوال هېواد ته راستانه شوي دي.
له دې مخکې د کډوالو په چارو کې د ملګرو ملتونو عالي کمیشنرۍ په ډاګه کړې وه، چې د یو شمېر افغان کډوالو د راستنېدو اصلي لاملونه د ژوند د لګښتونو ډېروالی او د کاري فرصتونو نشتوالی دی.
په همدې حال کې د خپرو شویو معلوماتو له مخې؛ اوس هم څه باندې شپږ میلیون افغان کډوال په ایران او پاکستان کې میشت دي.