پاکستان زلزله ځپلي افغانستان ته خپلې بېړنۍ مرستې همغږې کړې

د پاکستان د ناورینونو د مدیریت ملي ادارې (NDMA) د یکشنبې پرورځ په افغانستان کې د زلزله ځپلیو لپاره د بشري مرستو د پلان پر همغږۍ بېړنۍ غونډه وکړه، چې په کې د لټون او ژغورنې ډلې هم ونډه لري.

په هرات ولایت کې د شنبې پر ورځ د ۶ اعشاریه ۳ درجو دوه زلزلو او څو ورستیو ټکانونو زرګونه کسان سخت ځاني او مالي زیانمن کړي دي.

​ تر دې دمه ۲۰۵۳ کسان مړه شوي، له ۱۰ زره ډېر ټپیان او ۱۳ کلي په بشپړه توګه ویجاړ شوي دي.

د پاکستان د لومړي وزیر له دفتره په خپره شوې خبرپاڼه کې راغلي، چې د پاکستان د ناورینونو د مدیریت ملي ادارې مشر جنرال انعام حیدر ملک د دې غونډې مشري کوله، چې په افغانستان کې د پاکستان سفیر عبید الرحمان نظاماني، د پاکستان د بهرنیو چارو وزارت او نورو اړوند څانګو استازو ګډون کړی و.

نوموړي د غونډې ګډونوالو ته د افغانستان د هرات ولایت د زلزله ځپلي وضعیت او د هغو مرستو په اړه معلومات ورکړل، چې ژر تر ژره به ورور هېواد افغانستان ته واستول شي.

دې ادارې پر خوراکي توکو، درملو، خیمو او کمبلو سربېره د لټون او ژغورنې ډلې هم چمتو کړې دي.

جنرال انعام حیدر ملک د افغانستان لپاره د چټکو مرستو پر اړتیا ټینګار کړی او څرګندوي، چې مرستې باید د افغانستان لپاره د هوا او ځمکنیو لارو د ګړندیو وسیلو پر کارولو واستول شي. نوموړي دغه راز له ټولو دولتي ادارو او بنسټونو څخه په دې بهیر کې د اسانتیاوو او همغږۍ رامنځته کولو غوښتنه کړې ده.