تازه خبرونه
پاکستان له طالبانو سره ټینګه اړیکه لري- ولسمشر غني
ولسمشر غني، چې تېره ورځ( د چنګاښ ۷) پاکستان ته په دوه ورځني سفر تللی؛ د اسلام آباد د ستراتیژیکو اړیکو په انستیتوت کې یې د وینا پر مهال د اقتصاد او امنیت په ډګر کې له هغه هېواده د همکاریو غوښتنه وکړه.
ولسمشر غني پاکستان ته وړاندیز کوي، چې دواړه هېوادونه باید د همکاریو لپاره له هڅوونکې تګلارې ګټه واخلي او په راتلوونکې کې د ښو اړیکو جوړولو لپاره دواړه هېوادونه باید تېر هیر کړي.
ولسمشر ټینګار کوي؛ د اقتصاد او امنیت په برخو کې د پاکستان همکاري دواړو هېوادونو ته مهمې دي.
د پاکستان او طالبانو تر منځ ډېره پیاوړې تړاو شته، مونږ یې باید پر بشپړو پروګرامونو وپېژنو، چې د نښتو پر ځای همکاریو ته مخه کړو.
دا په داسې حال کې ده، چې اجرائیه رییس جینوا ته تللی او هلته یې د سولې بهیر دستراخوان غوړولی دی. عبدالله وایي، هیڅ افغان جګړه نه غواړي او په هېواد کې روانه جګړه پر افغانانو تپل شوې ده.
د نوموړي د څرګندونو له مخې؛ د افغانستان ډېري خلک په خپل هېواد کې د تلپاتې سولې ملاتړي دي؛ خو له بده مرغه جګړه پر افغانانو تپل شوې ده.
اجرایي رییس را روانې ټاکنې د هېواد په ټیکاو او سوله کې ډېرې مهمې بولي او تمه لري، چې دا ټاکنې رڼې او عادلانه تر سره شي.
هغه وایي: مونږ هیله لرو، چې عادلانه او آزادې ټاکنې ولرو؛ ځکه مونږ فکر کوو، چې دا ډول ټاکنې به په هېواد کې د ټیکاو له رواستو او ټینګښت سره مرسته وکړي.
زیات کارپوهان په دې باور دي، چې پاکستان د افغانستان د سولې په بهیر کې مهم رول لوبولی شي.
وبه کتل شي، چې د ولسمشر سفر کولی شي پاکستاني چارواکي د سولې په بهیر کې رښتینې همکارۍ ته چمتو کړي او که نه؟