تازه خبرونه
په اداري اسنادو کې د بهرنیو اصطلاحاتو د بدلون لپاره ځانګړې ډله جوړېږي
په دې فرمان کې راغلي، چې دا کمیټه به د عدلیې وزارت تر مشرۍ لاندې د لوړو زدهکړو، پوهنې، اطلاعاتو او کلتور وزارتونو، د علومو اکاډمۍ د عمومي ریاستونو او چارو ادارې له غړیتوب سره کار وکړي.
د افغانستان اسلامي امارت د رهبر د نوي فرمان پر بنسټ د امارتي ادارو په اسنادو کې د بهرنیو اصطلاحاتو د ارزونې او بدلون لپاره یوه ځانګړې کمیټه جوړېږي.
په دې فرمان کې راغلي، چې دا کمیټه به د عدلیې وزارت تر مشرۍ لاندې د لوړو زدهکړو، پوهنې، اطلاعاتو او کلتور وزارتونو، د علومو اکاډمۍ د عمومي ریاستونو او چارو ادارې له غړیتوب سره کار وکړي.
د دې فرمان د دوهیمې مادې له مخې؛ ټولې امارتي ادارې اړ دي، چې په خپلو اداري او اصولي اسنادو کې کارول شوي بهرني اصطلاحات راټول کړي او د لښتيلیک(جدول) پر بڼه یې مناسب بدیل وړاندیز او له دلیلونو سره یوځای یادې کمیټې ته وسپاري.
د فرمان په درېیمه ماده کې راغلي، چې کمیټه اړ ده، چې سپارل شوي شرایط وارزوي او د اسلامي او افغان اصطلاحاتو په پام کې نیولو سره ورته مناسب او مستند بدیلونه غوره او د وروستي تائید لپاره یې وروړاندې کړي.
دغه راز دا کمیټه کولی شي د اړوند ادارو استازو ته بلنه ورکړي، چې که اړتیا وي ورته نور معلومات هم چمتو کړي.
د دې فرمان د څلورمې مادې له مخې؛ دا حکم د صادرېدا له نېټې نافذ دی او ټاکل شوې، چې په رسمي جریده کې خپور شي.