سیمه ییز خبرونه
په افغانستان كې د نفتو د تصفيې لوى مركز جوړيږي
د كانونو وزارت په افغانستان كې د نفتو د تصفيې د يو لوى مركز له جوړولو خبر كړو.
د كانونو وزير وايي:
په ځينو شمالي ولايتونو كې د نفتو زيرمې شته، چې د نفتو د تصفيوي مركز په جوړيدو به افغانستان په دې برخه كې په ځان بسياينې ته نيژدې شي.
د كانونو وزير وحيد الله شهراني وايي:
په پام كې ده، چې په دې سيمه كې د گازو ټولې څاگانې ورغول شي.
شهراني زياتوي:
په پام كې ده، چې د افغان–تاجيك د نفتو حوزې د استخراج تړون د راتلونكې لمريزكال په پيل كې نړيوالې داوطلبۍ ته وړاندې شي، چې دا كار به نهه مياشتې وخت ونيسي.
د فارياب والي محمد الله بتاش وايي، چې:
د فارياب ولايت د افغان– تاجك په نفتي حوزه د تېلو د را ايستلو په موخه ودانۍ او تاسيسات جوړيږي، چې په نږدې راتلونكې كې به يې كار پيل شي.
د جوزجان والي عالم ساعي وايي:
همدا اوس د افغانستان په جوزجان ولايت كې گاز را ايستل كيږي او په همدې ځاى كې تصفيه كيږي، چې له دې لارې د گازو په برخه كې د يو شمېرخلكو اړتياوې پوره كوي.
د يادونې وړ ده، چې له دې گاز څخه د مزارشريف په كود برق فابريكه كې هم كار اخيستل كيږي.