تازه خبرونه
په افغانستان کې له پرېکړو څخه د ښځو ګوښه کېدا به روان کړکیچ پراخ کړي – ملګري ملتونه
(Last Updated On: کب ۲۱, ۱۴۰۲)
ملګرو ملتونو څرګنده کړې، چې له پرېکړو څخه د ښځو ګوښه کول افغانستان له کړکېچه د وتلو له هر فرصت څخه بې برخې کوي.
د ملګرو ملتونو د ښځو چارو څانګې د دغو خبرو تر څنګ د ښځو له حقونو پر سرغړونه، غږ بندولو او له ټولنې څخه د هغو ایستلو نیوکه کړې ده.
یادې ټولنې په ایکس پاڼه کې لیکلي، چې د ښځو پر حقونو برید، د هغوی د غږ بندېدا او له ټولنې څخه یې ایستل نه یوازې مجازات دي، بلکې پرعادي خبرو بدلیدونکې دي.
اسلامي امارت د نړیوالو بنسټونو دغې ادعاوې ردوي او څرګندوي، چې په افغانستان کې د ښځو او نجونو حقونه تر بل هر وخت خوندي دي.
په افغانستان کې د ښځو حقوق د اسلامي امارت او نړیوالې ټولنې تر منځ یوه ناندریزه مسله ده او ویل کیږي تر هغې، چې دا مسله حل نشي؛ له نړیوالې ټولنې سره به یې اړیکې هم رسمي بڼه غوره نکړي.