د هند حکومت د سې شنبې پر ورځ(د مرغومي درویشتمه ) د ځینو پاکستانيو ټولنیزو رسنیو دا ادعاوې رد کړِې، چې ګویا د هند او افغانستان ترمنځ سوداګري په ایران کې د ناکراریو له کبله ځنډول شوې او دا راپورونه یې دروغ او ګمراه کوونکي وبلل.

د هندي رسنیو د راپورونو له مخې، د هند د حکومت د اطلاعاتو او نشراتو ادارې (PIB) ویلي، چې د پاکستانيو تبلیغاتي پاڼو په ټولنیزو رسنیو کې یو جعلي لیک له ناسمو معلوماتو سره خپور کړی دی.

د دې ادرې په یوه پیغام کې لیکل شوي: “د پاکستانيو تبلیغاتي پاڼو له‌خوا یو جعلي لیک خپریږي او پر دروغو ادعا کوي، چې هند په ایران کې د ناکراریو د شدت له کبله له افغانستان سره خپله سوداګري لننډمهاله ځنډولې ده.”

د هند حکومت ټینګار کړی؛ په دې اړه هیڅ پرېکړه نده شوې او له افغانستان سره سوداګریز عملیات په عادي ډول روان دي.

د اسلامي همکاریو ټولنې غړیو هېوادونو ډیپلوماټانو د دې ټولنې د وزیرانو تماس ډلې کابل ته له سفر مخکې لومړنۍ مشورې ترسره کړې دي.

د قزاقستان دلووي ورځپاڼې د سې‌شنبې پر ورځ راپور ورکړی، چې دا مشورتي ناسته پر همغږۍ او په تخنیکي کچه د اجنډا پر وروستي کولو راڅرخېدلې ده.

د ناستې په بهیر کې ګډونوالو د غړیو هېوادونو ترمنځ د همغږۍ د سیاست پر اړتیا ټینګار وکړ، چې د سفر اغېزمنتوب او عملي پایلې پرې ډاډمنې شي.

دوی دا ټینګار هم کړی، چې اجنډا باید مهم سیاسي، بشري او اقتصادي مسایل راونغاړي.

د افغانستان په اړه د اسلامي همکاریو ټولنې د وزیرانو تماس ډله په استانبول کې د ۲۰۲۵ز. کال د جون پرمهال د غړو هېوادونو د بهرنیو چارو وزیرانو شورا په یوپنځوسمه غونډه کې د تصویب شوي پرېکړه‌لیک پر بنسټ جوړه شوه.

د دې ډلې هدف د غړو هېوادونو د هڅو همغږي کول، همکارۍ ته وده ورکول، د افغانستان په اړوند مسلو کې دوامداره ښکېلتیا او د سیاسي خبرو اترو، بشري مرستو او اقتصادي ملاتړ ډاډمنول دي.

د پاکستان اطلاعاتو وزیر عطاالله تارړ د دوشنبې پر ورځ (د مرغومي پر دوه‌ویشتمه) د افغان او هندي چارواکو ترمنځ د مخ پر زیاتېدونکو اړیکو په اړه اندېښنه څرګنده کړې ده.

د تارړ د څرګندونو له مخې؛ په هند کې د افغان چارواکو شتون او د دوی خبرې “هر څو ورځې یو ځل” د پاکستان د بې‌ثباته کولو لپاره د بهرنیو له پلانونو ملاتړ ښیي.

نوموړي هغه وسلوالې ډلې، چې بریدونه ترسره کوي؛ د “بهرنیو د پلان شوي پروګرام ” پیروان بولي او وایي: “دا څه ډول اسلام دی، چې له هند پیسې اخلي او دلته چاودنې کوي؟!”

دا څرګندونې هند ته د افغانستان بهرنیو چارو وزیر امیر خان متقي، د عامې روغتیا وزیر نور جلال جلالي او د صنعت او سوداګرۍ وزیر نورالدین عزیزي د تیر کال سفرونو ته نغوته( اشاره) کوي، چې پاکستان یې له وسله‌والو ډلو څخه پر ملاتړ تورونوي. په داسې حال کې، چې هند او کابل دا تورونه رد کړي دي.

د پاکستاني پوځ د راپور له مخې؛ په ۲۰۲۵ کال کې ۵ زره ۳۹۷ وسلوال بریدونه شوي، چې ۳ زره  ۸۱۱ یې په خیبر پښتونخوا او ۱ زر و ۵۵۷ بلوچستان کې تر سره شوي دي.

د پاکستان امنیتي ځواکونو هم ۷۵ زره ۱۷۵ استخباراتي عملیات ترسره کړي او ۲ زره ۵۹۷ وسلوال یې له منځه وړي دي.

د پاکستان اطلاعاتو وزیر ویلي؛ حکومت به پخپل ټول ځواک له وسلوالو سره مبارزه وکړي او د پاکستانيانو امنیت به ډاډمن کړي.

دغه راز د بهرنیو چارو وزارت د دفتر عمومي رییس محب الله وثیق د اسلامي امارت د متوازن بهرني سیاست د ټینګار تر څنګ ویلي؛ د متقابل درناوي د اصل پر بنسټ له هند جمهوریت سره د دوه اړخیزو اړیکو پراخول مو د هېواد د بهرني سیاست یو لومړیتوب دی.

د نوموړي د څرګندونو له مخې؛ له څلور کلنو سیاسي اړیکو او تعاملاتو وروسته د اړیکو دا نوی پړاو د اقتصادي همکارۍ د پیاوړتیا، سوداګرۍ پراخولو، دوه اړخیزو اړیکو پیاوړتیا او د دواړو هېوادونو ترمنځ د ګډو ګټو د خوندي کولو لپاره یو مهم فرصت برابروي؛ دا یو داسې ګام دی، چې کولی شي په سیمه‌ییز ثبات او پرمختګ کې اغېزمن رول ولوبوي.