د هوا حالاتو بدلونونه
په انترکتیکا کې د کنګلونو اوبه کېدا نړۍ ته ګواښ دی
نوې څېړنې ښیي، چې د انتراکتیکا کنګلونه مخ پر اوبه کېدو دي او کولی شي، چې نړیوال اقلیم، سمندري خواړو او ان د یخو سیمو ثبات ته ویجاړونکي پایلې رامنځټه کړي.
د یوې څېړنې له مخې، چې د چارشنبې پر ورځ ( د وري پر نهمه ) په نیچر مجله کې خپره شوې؛ ښایي تر ۲۰۵۰ ز. کال پورې به سویلي قطب کې د سمندر د ژورو اوبو بهیر ۴۰ سلنه لږ شي.
د اورګان ایالت پوهنتون اقلیم پوه آلن میکس ویلي؛ دا د حیرانتیا خبره ده، چې دا په چټکۍ سره پېښیږي.
د تودوخې له زیاتېدو سره، د انترکتیکا د کنګلونو اوبه اقیانوس سمندر ته ننوځي، چې ورسره د سطحي اوبو مالګینتوب او غلظت کموي. له دې سره به د بحرونو د اوبو د کښته کیدو بهیر کم شي، چې ورسره به د سمندرونو دوراني حالت ته ستونزې رامنځته کړي.
ویل کیږي، چې د یخ له اوبه کېدو سره به د اوبو اغېزې تر څېړنو لاندې ونیول شي؛ ځکه، چې دا د راتلونکې لپاره یوه بنسټیزه څېړنه ده.
د دې څېړنې یو لیکوال ستیو رینتول ویلي: د سمندر کښته غورزېدل غذایي موادو ته اجازه ورکوي، چې له لاندې څخه پورته حرکت وکړي او ورسره به میکروسکوپي ژوندي موجودات له نړیوال تولید او خواړو ووځي.