د بریټانیا حکومت د امریکا د جنګ وزیر پیټ هګسټ پر څرګندونو نیوکه کړې، چې د افغانستان په جنګ کې یې د ناټو د متحدانو ونډه کمه ښودلې وه. د بریټانیا حکومت ویلي، چې د هګسټ څرګندونې د بریټانیا او نورو متحدانو د سرتېرو سرښندنې له پامه غورځوي.

د بریټانیا حکومت ویلي، چې په افغانستان کې د دې هېواد او د ناټو د ځواکونو ونډه کره او مستنده ده او د جګړې پر مهال د زرګونو بریټانیایي کورنیو او د دغه هېواد د متحدانو کورنیو سرښندنې کړې دي.

د بریټانیا د لومړي وزیر ویاند ویلي:« د دغو سرتېرو او د ناټو د نورو ځواکونو سرښندنې د ګډ امنیت د ټینګښت او زمونږ پر یوه متحد د برید په غبرګون کې شوې وې.»

هغه زیاته کړې، چې د دغو ځواکونو د ونډې کم ښودل ناسم کار دی.

د بریټانیا حکومت یادونه کړې، چې په افغانستان کې یې له ۴۵۰ ډېر سرتېري وژل شوي او ټینګار یې کړی، چې د هغوی خدمتونه او سرښندنې به هېڅکله هېرې نه‌شي.

هګسټ، چې په افغانستان کې یې د مینه‌سوټا ایالت د ملي ګارد روزنې دنده لرلې؛ د شنبې پر ورځ په یوه وینا کې دا څرګندونې کړې دي.

هغه ویلي؛ سره له دې، چې په کابل کې د ناټو پر مشرۍ د ائتلاف په مرکزي دفتر کې د ۵۰ هېوادونو استازي حاضر ول، خو یوازې د لږ شمېر هېوادونو ځواکونو د افغانستان په جنګ کې ونډه لرله.

د افغانستان د جګړې پر مهال نږدې ۲۵۰۰ امریکایي سرتېري وژل شوي وه. د  نورو هېوادونو ۳۰ سرتېري هم په دې جګړه کې وژل شوي، چې ۴۵۷ بریټانیایي سرتېري وه.

د روان کال په جنوري کې د امریکا ولسمشر ډونالډ ټرمپ ویلي وه، چې په افغانستان کې د ناټو ځواکونو د جګړې له لومړۍ کرښې واټن ساتلی و. د بریټانیا هغه مهالني لومړي وزیر کېیر سټارمر دغه څرګندونې« سپکوونکې او ټکان ورکوونکې» بللې وې او د بښنې غوښتنه یې کړې وه.

د ایران بهرنیو چارو وزیر عباس عراقچي ويلي، چې تهران او مسکو د افغانستان د مسئلو، د کابل او اسلام‌آباد ترمنځ د کړکېچ کمولو او د ترهګریزو ګواښونو پر وړاندې د مبارزې په اړه ګډ نظر لري.

عراقچي دا څرګندونې د دوشنبې پر ورځ په تهران کې د روسیې د بهرنیو چارو له وزیر سرګې لاوروف سره په یو ګډ خبري کنفرانس کې کړې دي.

له دې مخکې په پاکستان کې د روسیې سفیر البرټ خوروف ویلي وه، چې مسکو د افغانستان او پاکستان ترمنځ د کړکېچ د کمولو هڅې کوي.

خوروف زیاته کړې وه، چې د روسیې کورنیو چارو وزیر ولادمیر کولوکولتسوف اسلام‌آباد ته د سفر پر مهال د افغانستان موضوع هم څېړلې او روسیې په دې برخه کې د همکارۍ چمتووالی ښودلی و.

هغه ویلي، چې د ډیورنډ کرښې د لارو تړل کېدا د روسیې او د منځنۍ آسیا د هېوادونو پر لوري د پاکستان پر سوداګرۍ منفي اغېز کړی دی.

دغه راز نوموړي د سوداګرۍ د پراختیا پر وړاندې د امریکا بندیزونه هم خنډ بللي دي.

خوروف ویلي، چې د کابل او اسلام‌آباد ترمنځ د کړکېچ هوارېدا به د ټولې سیمې پر ګټه وي.

هغه هیله څرګنده کړې، چې د ډیورنډ کرښې لارې به ژر تر ژره بېرته پرانیستل شي.

د اسلامي امارت لوړپوړي غړي انس حقاني تېره ورځ د افغانستان فوټبال فډراسیون په لوبغالي کې له نږدې څخه د لوبې د نندارې پر مهال د آریانا سپورټ د خبریال د پوښتنې په ځواب کې ویلي:« انسان سپورټ او تفریح ته اړتیا لري.»

 هغه زیاته کړې:« فوټبال او والیبال مې د خوښې لوبې دي. لوبه هغه وخت ګټل کیږي، چې لوبغاړي پر لوړه روحیه د لوبو ډګر ته ډاډمن ودانګي او ملت ته د بریا راوړلو په فکر کې وي.»

نوموړي د خپلو خبرو په یوه بله برخه کې ویلي، چې افغانستان په بېلابېلو برخو کې د پرمختګ وړتیا لري او دا ځل به د پخواني شوروي اتحاد او امریکا د حضور ورو ته له ورته ستونزو سره مخ نه‌شي.

هغه ویلي:« افغانستان وړتیا لري، چې په هره برخه کې پرمختګ وکړي او په هر ډګر کې له نورو ملتونو سره سیالي وکړي.»

حقاني زیاته کړې، د ماشومتوب پر مهال جګړې، کډوالۍ او د امکاناتو نشتوالی د دې لامل شوی و، چې دی او د ده د هم‌عمره کسانو نسل له هغو فرصتونو بې‌برخې پاتې شي، چې د نن ورځې ځوانان یې په واک کې لري.