تازه خبرونه
په روژه کې د ټنګ ټکور خپرولو له کبله صدای بانوان رادیو وتړل شوه
(Last Updated On: وری ۱۳, ۱۴۰۲)
د روژې په مبارکه میاشت کې د ټنګ ټکور خپرولو له کبله د بدخشان ولایت د ښځو رادیو ( صدای بانوان) وتړل شوه.
د بدخشان ولایت د اطلاعاتو او فرهنګ رییس معزالدین احمدي په دې اړه د بریتانیا ګاردین ته څرګنده کړې، چې دې رادیوي مرکز د روژې په مبارکه میاشت کې څو ځلې د سندرو او ټنګ ټکور پر خپرولو د اسلامي امارت قوانین او مقررات تر پښو لاندې کړي او د سرغړونې له کبله بند شوی دی.
معزالدین احمدي ویلي: که دا رادیو د افغانستان اسلامي امارت پالیسي ومني او تضمین ورکړي، چې بیا به تېروتنه نهتکراریږي؛ مونږ به یې د بیا فعالیت اجازه ورکړو.
ګارډین د څرګندونو له مخې؛ د رادیو مشرې ناجیه سروش هر راز سرغړونه رد کړې او وایي، چې دا یوه دسیسه ده.
ناجیه سروش دا هم ویلي، چې طالبانو مونږ ته وویل، چې تاسې ټنګ ټکور خپروي. مونږ هیڅ ډول ټنګ ټکور خپور کړی ندی.