سیمه ییز خبرونه
په فارياب كې ډېرى خلك د اختر د نماځلو او خوښيو پر ځاى د غم په ټغر ناست دي
په فارياب كې د لوى اختر په لومړى ورځ تر ځانمرگي بريد وروسته ډېرى خلك د اختر د نمانځلو او خوښيو پر ځاى د غم په ټغر ناست دي او د خپلو وژل شويو دوستانو د فاتحې په مراسمو كې گډون كوي.
كومو كسانو، چې د جمعې د ورځې د ځانمرگي بريد د وژل شويو كسانو د فاتحې په مراسمو كې گډون كړى وايې:
د لوى اختر په لومړۍ ورځ دغه بريد د اسلام د ښمنانانو كار دى.
د ولسي جرگې د روغتيا او ځوانانو د كميسيون رئيس ډاكټر نقيب فايق وايې:
كه حكومت او نړېواله ټولنه د فارياب د امنيتي حالت د ښه والي په موخه كار ونه كړي، خلك به د لاريونونو له قانوني حق څخه استفاده وكړي.
د عامې روغتيا وزيره ثريا دليل، چې د فارياب په مركز ميمنې ښار كې د وروستي ځانمرگي بريد د ټپيانو د درملنې د څارنې لپاره دې ولايت ته تللې، وايې:
د ډېرو ټپيانو روغتيايي حالت ښه دى او په كور دننه به يې درملنه وشي.
د هغې په وېنا د اړتيا په صورت كې دولت چمتو دى ټپيان بهر ته واستوي او لگښت به يې هم وركړي.
په مېمنه كې تر دې بريد وروسته د كورنيو چارو او عامې روغتيا وزيران او د ملي امنيت رئيس د يوه جگپوړي پلاوي په مشرۍ فارياب ته ولاړل.
په فارياب كې دغه بريد نړيوال غبرگونونه هم را وپارول.
د سعودي عربستان پاچا ملك عبدالله، د آلمان او ايرلند د بهرنيو چارو وزيرانو دا پېښه وغندله.
د آلمان د بهرنيو چارو وزير وويل، هېواد به يې په افغانستان كې د امنيت د ټينگښت لپاره خپلې همكارى روانې ساتي.
په كابل كې د امريكا سفارت هم دا بريد غندلى او د افغانستان د امنيت د ټينگښت لپاره يې د خپل هېواد د مرستو پر دوام ټينگار كړى دى.