په كابل كې د استاد رباني د ترور پېښې د څېړلو گډه غوښتنه وشوه

دغو لاريون كوونكيو، چي شمېر يې سلگونو تنو ته رسيدو د پاكستان د استخباراتو او په هېواد كې د يو شمېر ځانگړيو كړيو  پر ضد  شعارونه وركول او د سولې د عالي شورا د رييس برهان الدين رباني د ترور په اړه يې  د څېړنو او د دغه ترور د عاملينو د پيدا كولو غوښتنه كوله.

د ملي امنيت پخوانى ريس امرالله صالح، چې په ياد لاريون كې يې گډون كړى و د سولې د عالي شورا د ريس برهان الدين رباني وژنه يې يوه پېچلې او گونگه دسيسه وبلله او د ملگرو ملتونو له سازمان يې وغوښتل، چې د يادې دسيسې د نورو اړخونو په پيدا كولو د افغانستان خلكو ته حقايق روښانه كړي.

كه څه هم د استاد برهان الدين رباني د وژنې د څېړنې په موخه د جوړ شوي كميسيون وياند احمد ضيا خبر وركړ، چې:

پر استاد  برهان الدن رباني د ځانمرگي بريد په تړاو يې يو تن نيولى، خو د ملي امنيت پخوانى رييس وايي، چې:

په دې برخه كې د افغان حكومت څېړنې د اعتبار وړنه دي او مشروعيت نه لري، ځكه، چې د ده په وينا  د دولت يو شمېربرخې د دوښمن په خدمت كې دي.

امرالله صالح په يوه درې ماده ييز پرېكړه ليك كې ويلي، چې:

دوى د ترهگرو د محاكمې غوښتونكي دي او نه غواړي، چې د مصلحت له مخې وبخښل شي.

د سولې د عالي شورا ريس برهان الدن رباني د ۱۳۹۰ ل كال د وږي په ۲۹ په كابل كې په يو ځانمرگي بريد كې ووژل شو.

لاريون كونكي وايي:

ترهغې، چې د استاد رباني  وژونكي نه وي محاكمه شوى له وسله والو طالبانو سره سوله مشروعيت نه لري.