په لبنان کې د حزب الله لوړپوړی قومندان ووژل شو

رویټرز خبري اژانس راپور ورکړی، چې د دوشنبې پر ورځ په لبنان کې د حزب الله جګپوړی قومندان وسام الطویل د اسرائیلو په برید کې ووژل شو.

په لبنان کې یوې سرچینې ویلي، ویسام تاویل د حزب الله د رضوان د ځانګړو ځواکونو قومندان و.

ویسام الطویل هغه مهال ووژل شو، چې د لبنان د سویل په یوه کلي کې د هغه پر موټر برید وشو. په دغه برید کې د حزب الله یو بل غړی هم وژل شوی دی.

د اکټوبر پر اوومه پر اسرائیلو د حماس له پراخ برید وروسته په لبنان کې د اسرائیلو پر بمبارد د حزب الله له ۱۳۰ ډېر غړي وژل شوي دي.

دا د اسرائیلو او ایران تر ملاتړ لاندې حزب الله تر منځ له  ۲۰۰۶ کال راپدیخوا تر ټولو خونړی برید دی.

حزب الله د اسرائیلو پر پوستو د راکټونو او نورو وسلو ډزې کړي او اسرائیلو پرې  هوایي او توپچي بریدونه پیل کړل.

د راپورونو له مخې، د پولې دواړو غاړو ته په لسګونه زره خلک تښتیدلي او ورسره د پراخې جګړې اندېښنې رامنځته شوې دي.

حزب الله ويلي؛ د اسرائیلو پر ضد یې د اوسني کمپاین موخه د غزې په تړانګه کې د فلسطینیانو ملاتړ  دي. د حزب الله او اسرائیلو تر منځ جګړه تر ډېره د لبنان او اسرائیل پولې ته په څېرمه سیمو کې شوې ده.

د اسرائیلو له‌خوا سمدستي کومه تبصره نه‌ده شوې.

دا په داسې حال کې ده، چې د حزب الله مشر سید حسن نصرالله تېره اوونۍ په دوه تلویزوني ویناوو کې اسراییلو ته د جګړې نه‌کولو خبرداری ورکړ او څرګندوي: څوک، چې له مونږ سره د جګړې فکر کوي  په یوه کلمه کې؛ هغه به پښېمانه شي.