تازه خبرونه
په مسلکي بستونو کې د نامسلکي کسانو ټاکل دردونکې او خواشینوونکې ده
کورنیو چارو وزیر سراج الدین حقاني د خوست ولایت د شیخ زاید پوهنتون له نویو فارغ شویو زدکړیالانو وغوښتل، چې له ستونزو سره مقابله وکړي او له هېواده ونتښتي.
د کورنیو چارو وزیر د خوست ولایت شیخ زاید پوهنتون فارغانو ته د وینا پر مهال د دولتي ادارو په مسلکي بستونو کې د نامسلکي کسانو پر ګومارنې نيوکه کړې او دا يې دردونکې او خواشینوونکې وبلله.
سراج الدین حقاني وایي: دا زما لپاره یو دردناک خبر دی، چې مسلکي بستونو ته نامسلکي شخص ورځي؛ ځکه، نو له تاسې غوښتنه کوم، چې له هېواد سره د مینې او له حکومت سره د همکارۍ په خاطر یووالی او اتفاق وساتئ، چې ستونزې اوارې شي.
د کورنیو چارو وزیر زیاته کړې: دا د ده لپاره د نهیلۍ خبره ده، چې په حکومت کې ځوانانو ته مناسب کاري فرصتونه ندي برابر شوي، خو له ځوانانو غواړي، چې له ستونزو سره مقابله وکړي او له هېواده د تېښتې لاره خپله نه کړي.
په هېواد کې د اسلامي امارت له بیا واکمنېدو او د نوي حکومت له جوړېدو راپدیخوا تل داسې نیوکې کېږي، چې په دولتي ادارو کې مسلکي کسانو ته لږ فرصت برابر شوی او د ځوانانو او ښځو ونډه پکې پیکه ده. سیاسي شنونکی سید مقدم امین په دې باور دي: هر څومره، چې په دولتي ادارو کې مسلکي کسان وګومارل شي، په همغه کچه به خلکو ته ښه خدمتونه وړاندې شي او د خلکو او دولت ترمنځ د واټن رامنځته کېدو مخه به ونیول شي.
که څه هم د اسلامي امارت چارواکو په وار وار ویلي، چې په دولتي ادارو کې سلګونه زره پخواني دولتي کارکوونکي دندې ترسره کوي؛ خو دا لومړی ځل دی، چې یو لوړ پوړی دولتي چارواکی د دولتي ادارو په مسلکي بستونو کې د نامسلکي کسانو پر ګومارلو نیوکه کوي.
تازه خبرونه
بیجینګ دې له کابل سره د ترهګرۍ په اړه خبرې وکړي – اسلامآباد
د پاکستان د پلان او پراختیا وزیر احسان اقبال ويلي، اسلامآباد له بیجینګ غواړي، چې له کابل سره د تروریزم پر موضوع خبرې وکړي.
احسان اقبال له امریکا غږ سره په مرکه کې، چې نن یکشنبه (د غویی دېرشمه) خپره شوې؛ ویلي، پاکستان په افغانستان کې د میشتو ترهګرو ډلو په اړه اندېښنه لري، چې له دغه هېواده بهر ترهګریز فعالیتونه کوي.
هغه زیاته کړې: هغه ترهګر، چې د چینايي کارګرانو پر وړاندې یې وروستۍ پېښه کړې هم له افغانستان راغلي؛ نو زما په اند دا د اندېښنې وړ دي. مونږ هیله لرو، چې چین به هم افغانستان قانع کړي؛ ځکه افغانان هم په سیمه کې د چین واکمنۍ ته غوږ نیسي.
دغه پاکستاني چارواکي ویلي؛ په افغانستان کې د کړکېچ له کبله پاکستان ندی توانېدلی، چې په خپلو بېخبناوو کې پانګونه وکړي.
هغه افغانستان ته په نغوته کې ویلي، چې پاکستان له چین سره هوکړه کړې، چې د چین – پاکستان اقتصادي دهلیز په پروژه کې درېیم هېواد هم شامل کړي.
دا په داسې حال کې ده، چې له دې وړاندې هم اسلامي امارت د پاکستانيو چارواکو اړوند امنیتي تورونه رد کړي.
تازه خبرونه
په فاریاب کې سیلابونو ۱۸ کسان مړه او سلګونه کورونه ویجاړ کړل
د کډوالو او راستنیدونکیو چارو وزارت څرګنده کړی، چې په فاریاب ولایت کې تېره شپه سېلابونو ۱۸ کسان مړه او دوه نور ټپیان کړي دي.
د دې وزارت په خبرپاڼه کې راغلي، چې سیلابونو په پښتونکوټ، المار، قیصار، بلچراغ، خیبر او دولتآباد ولسوالیو کې راوتلي دي.
د دغه وزارت د څرګندونو له مخې؛ د سېلابونو له کبله ۵۶۰ کورونه، ۸۵۰ جریبه کرنیزه ځمکه، ۱۱۰ پلورنځي او یو ګرځنده روغتیایي مرکز ویجاړ شوي دي.
ویل کیږي، چې ۳۰۰ څاروي او دوه زره میوه لرونکې ونې له منځه تللې دي.
تازه خبرونه
له سوالګرۍ څخه د مخنیوي قانون په رسمي جریده کې خپور شو
د اسلامي امارت د عدلیې وزارت د څرګندونو له مخې؛ د سوالګرو راټولولو او له سوالګرۍ څخه د مخنیوي قانون، چې په یوه مقدمه، ۳ فصلونو او ۲۷ مادو کې ترتیب شوی؛ د اسلامي امارت رهبر مولوی هبة الله اخوندزاده توشیح کړی او په رسمي جریده کې خپور شو.
د عدلیې وزارت ويلي؛ د دغه قانون له مخې روغ، کاسب او هغو کسانو لپاره، چې د یوې ورځې د خوراکي توکو د برابرولو وړتیا لري، سوال کول منع دي.
دا قانون د سوال کولو لپاره د ماشومانو او معلولینو کارول هم منع کوي.
د دغه قانون له مخې: هغه مسلکي سوالګر، چې د خلکو د خواخوږۍ د جلبولو په موخه له ماشوم، لیوني او معيوب څخه کار اخلي؛ د محکمې لهخوا پر يوه مياشت بند محکومېږي او تنظيموونکي يې تر شپږ مياشتو پورې پر بند محکومېږي.
په ۱۴۰۱ لمریز لېږدیز کال کې، د اسلامي امارت مشر د سوالګرو راټولولو امر وکړ، چې تر اوسه په لسګونو زره سوالګر راټول او په اړه یې بېلابېلې پرېکړې شوې دي.
-
د هوا حالاتو بدلونونه4 days ago
په تېرو ۲ زره کلونو کې د تېر کال اوړی له ټولو تود و – څېړنه
-
سوداگري3 days ago
د صنایعو او سوداګرۍ وزارت چارسمبالي د تاتارستان له ولسمر سره وکتل
-
سیمه ییز خبرونه5 days ago
پر رفح د اسرائیلو بریدونه په نړیواله محکمه کې ارزول کیږي
-
تازه خبرونه3 days ago
د تورخم لار لنډمهاله تړل کیږي
-
تازه خبرونه3 days ago
جاپان د افغانستان له سیلاب ځپلیو سره د بېړنیو مرستو ژمنه وکړه
-
نړۍ4 days ago
اروپايي ټولنې روسي رسنۍ هم د بندیزونو په نوملړ کې ورزیاتې کړې
-
لوبی1 day ago
راشد خان د افغان بیسیم مخابراتي شرکت رسمي سوداګریز سفیر شو
-
سوداگري4 days ago
تېر کال د صادراتو او وارداتو ارزښت له ۱۰ میلیارډ ډالرو ډېر و – د احصائې ملي اداره