سیمه ییز خبرونه
په ننگرهار كې طالبانو د پولیسو يو افسر او دوه سرتېري وژلي
د ننگرهارپه خوږیاڼو ولسوالۍ کې وسله والو طالبانو د پولیسو یو افسر او دوه سرتېري پر ډزو وژلي دي.
د ننگرهارامنيه كوماندانۍ وياند حضرت حسين مشرقيوال وايي:
وژل شوي یو ساتنمن او دوه پولیسو د دې ولايت په چپرهار او پچیراگام ولسوالیو کې دندې درلودې. دوى په داسې حال كې وژل شوي، چې خپلو کورنو ته په رخصتیو روان ول.
د نوموړي په وينا:
د خوږیاڼو ولسوالۍ د ادوړ په سیمه کې وسله والو طالبانو د دغو پوليسو پر شخصي موټر وسله وال برید کړی او درې واړه وژل شوي دي .
مشرقيوال زياتوي:
په پېښه کې موټر چلوونکى ټپي شوی دی.
مشریقوال همدا راز وايي:
له پيښې سره د تړاو په تورڅوک نیول شوي نه دي، خو په اړه یې پلټنې پیل شوې دي.
وسلوالو طالبانو د دې بريد مسووليت په غاړه اخيستى او ویلي يې دي، چې په بريد کې یې دوه افسران او يو پوليس وژلي دي.
د يادونې وړده، چې د ننگرهار ولايت دغه جنوبي سيمه له تېرو څو كلونو يوه ناامنه سيمه پېژندل شوې او تل په كې د گډو ځواكونو هوايي او ځمكني بريدونه تر سره كيږي.