نړۍ
په نیپال کې د راغورزېدلې الوتکې د ځاني زیان شمېر ۶۸ ته پورته شو
د رویترز خبري آژانس راپور ورکړی، چې له تېرو درې لسیزو راپدیخوا په نیپال کې د تر ټولو بدې هوایي پېښې له کبله د مړو شمېر ۶۸ ته لوړ شوی دی.
د یکشنبه پر ورځ لږ تر لږه ۶۸ کسان ووژل شول کله، چې د یتي هوایي شرکت یوه کورنۍ الوتکه د نیپال په پوخارا کې راغورزېدلې، چې په کوچني همالیا هېواد کې له تېرو درې لسیزو راپدیخوا ترټولو مرګونې هوایي پېښه وه.
د ژغورونې په سلګونه کارکوونکي د غونډۍ څنډې ته ورغلل، چې الوتکه له پلازمېنې کتمندو څخه ۷۲ کسانو په کې سفر کاوه.
چارواکو د شپې ناوخته د لټون عملیات ودرول او څرګندوي، چې دوی د دوشنبې پر ورځ به یې بیا پیل کړي.
د ځایي تلویزیون انځورونه ښیي، چې د ژغورنې کارکوونکي د ویجاړې الوتکې شاوخوا ګرځي. د پېښې ځای ته له څېرمې ځمکې د اور لمبې پورته کیږي.
د راپورونو له مخې؛ د دغې هوایي پېښې د غورزېدو لامل تر اوسه معلوم ندی.
د رویترز په وینا؛ دا د ۱۹۹۲ راپدیخوا په نیپال کې ترټولو مرګونې هوایي پېښه وه.
د دغه هېواد د هوایي چلند د څرګندونو له مخې؛ د پاکستان نړیوال هوایي شرکت ایربس A300 کتمندو ته له نږدې کیدو سره په یوه غره کې ولویده، چې په کې سپاره ټول ۱۶۷ کسان مړه شول.
په نیپال کې له ۲۰۰۰ ز. کال راپدیخوا نږدې ۳۵۰ کسان د الوتکو یا چورلکو د غورزیدو له کبله مړه شوي دي. د نړۍ د ۱۴ لوړو غرونو څخه ۸ یې د ایوریست په ګډون د هوا ناڅاپي بدلونونه او خطرناک شرایط رامنځته کوي.
اروپایي اتحادیې د خوندیتوب د اندېښنو له کبله له ۲۰۱۳ ز. کال راپدیخوا د نیپال هوایي شرکتونه له خپل هوایي حریم څخه منع کړي دي.
د نیپال مالیې وزیر بشنو پادیل خبریالانو ته ویلي، حکومت د الوتکې د غورزېدو د علت د څېړلو لپاره یو پلاوی جوړ کړی او تمه ده، چې په ۴۵ ورځو کې به راپور بشپړ شي.
د فرانسې د هوايي حادثې تحقیقاتو ادارې BEA ویلي، چې دوی به د الوتکې د غورزېدو د لاملونو په څېړنه کې برخه واخلي او د ټولو ښکېلو اړخونو سره به همغږي وکړي.
د ملکي هوايي چلند ادارې په خبرپاڼه کې ویل شوي، چې د دوه انجنونو ATR 72 الوتکې په سپرلۍ کې درې ماشومان هم ول.
د رویترز د راپور له مخې؛ په مسافرو کې پېنځه هندي، څلور روسی او یو ایرلیندي، دوه د جنوبي کوریا، یو آسترالیایي، یو فرانسوی او یو د ارجنتاین وګړي سپاره ول.
پوخارا، د نیپال ترټولو مشهور سیاحتي ښار دی، ډېري یې د غرنیو سړکونو له لارې د شپږ ساعته اوږد موټر پر ځای لنډې الوتنې غوره بولي؛ خو غرنی موقعیت یې الوتنو ته ډېر خطرناک دی.
د پوخارا د هوايي ډګر یوه ویاند ویلي، الوتکه هوايي ډګر ته د نېږدې کېدو پر مهال راغورزېدلې او زیاتوي، چې الوتکه په ۱۲۵۰۰ فوتو کې کښته شوه او په نورمال ډول کښته کېدله؛ خو د یکشنبې پر ورځ هوا روښانه وه.
یو شمېر سرچینو ویلي؛ د یتي ایرلاین الوتکه ۱۵ کلنه ده او په زاړه ترانسپورتي وسایلو سمباله وه، چې د اعتبار وړ معلومات نلري.
دغه راز څرګنده شوې؛ د پوخارا هوایي ډګر د بحر له سطحې څخه شاوخوا ۲۷۰۰ فوته پورته موقعیت لري.
د نیپال هېواد د هغو مسافرینو په غم کې، چې خپل ژوند یې له لاسه ورکړی؛ د دوشنبې لپاره خپلې ټولې منظمې الوتنې لغو کړې دي.