د بشري حقونو څار بنسټ د ملګرو ملتونو د مرستندویه پلاوي(یوناما) د راپورونو پر بنسټ ویلي، چې د افغانستان په ختیځو سیمو کې د پاکستان وروستیو هوايي بریدونو د ملکي وګړو د مرګ او ‌ژوبلې د زیاتېدا او د جګړې د نړیوالو قوانینو د احتمالي نقض په اړه اندېښنې ډېرې کړې دي.

دغه بنسټ زیاته کړې، د یوناما د شمېرو له مخې د جون پر نهه‌ویشتمه د پاکستان په هوايي بریدونو کې د افغانستان په درې ختیځو ولایتونو کې لږ تر لږه ۲۸ ملکي وګړي شهیدان او ۴۹ نور، چې ښځې او ماشومان هم په کې شامل دي؛ ټپیان شوي دي.

د بشري حقونو څار بنسټ زیاته کړې، چې پاکستاني چارواکو ویلي؛ د دغو بریدونو هدف هغه وسله‌وال ول، چې په کراچۍ کې پر پاکستاني امنیتي ځواکونو د وروستیو بریدونو مسوول بلل شوي؛ خو نور جزئیات یې نه‌دي ورکړي. اسلامي امارت دغه ادعاوې رد کړې دي.

د یاد بنسټ د څرګندونو له مخې، د ۲۰۲۶ کال په لومړیو درې میاشتو کې د پاکستانيو بریدونو له کبله له ۷۵۰ څخه ډېر افغان ملکي وګړي شهیدان یا ټپیان شوي، چې ډېری یې په ختیځ او سویل افغانستان کې د هوايي بریدونو قربانیان دي.

د بشري حقونو څار بنسټ ټینګار کړی، چې د ملکي وګړو مرګ او ‌ژوبله په یوازې ځان د جګړې د قوانینو د نقض ثبوت نه‌ګڼل کېږي؛ خو د قربانیانو د شمېر زیاتوالی د احتمالي جنګي جرمونو په اړه د خپلواکو او بې‌طرفه څېړنو اړتیا پیاوړې کوي.

د ملګرو ملتونو سرمنشي انټونیو ګوټرش د چارشنبې پر ورځ بنګلدېشۍ ډیپلوماټه رباب فاطمه د افغانستان لپاره خپله نوې ځانګړې استازې او د افغانستان لپاره د ملګرو ملتونو د مرستندویه پلاوي(یوناما) مشره وټاکله.

د ملګرو ملتونو د سرمنشي دفتر ویلي، رباب فاطمه د روزا اوتونبایوا ځای ناستې ده او په ملکي خدمتونو او ډیپلوماسۍ کې له ۳۰ کلونو ډېره تجربه لري.

د خبرپاڼې له مخې، نوموړې اوس‌مهال د ملګرو ملتونو د سرمنشي د مرستیالې او د لږو پرمختللو، د وچو او کوچنیو ټاپوییزو هېوادونو لپاره د دې ټولنې د لوړې استازې په توګه دنده ترسره کوي.

رباب فاطمه له ۲۰۱۹ څخه تر ۲۰۲۲ز.کال پورې په نیویارک کې د ملګرو ملتونو د بنګلدېش د دایمي استازې په توګه هم دنده ترسره کړې ده.

ملګرو ملتونو تر اوسه افغانستان کې د نوموړې د ماموریت د پیل نېټه نه‌ده اعلان کړې.

د افغانستان اسلامي امارت بهرنیو چارو وزیر مولوي امیرخان متقي او ورسره مل پلاوي نن( د چنګاښ څلیریشتمه) په دوحه کې د قطر د پخواني امیر شیخ حمد بن خلیفه آل ثاني د مړینې له کبله د اسلامي امارت د مشرتابه له لوري د قطر امیر شیخ تمیم بن حمد آل ثاني ته د خواخوږۍ او ډاډګېرنې مراتب وړاندې کړل.

په دې سفر کې امیرخان متقي د قطر د وزیرانو شورا له رییس او د بهرنیو چارو له وزیر شیخ محمد بن عبدالرحمن آل ثاني، د وزیرانو شورا له مرستیال او د دفاع له وزیر شیخ سعود بن عبدالرحمن بن حسن آل ثاني او همدارنګه په بهرنیو چارو وزارت کې د دولت له وزیر ډاکټر محمد بن عبدالعزیز الخليفي سره هم وکتل.

نوموړي په دغو لیدنو کې د شیخ حمد بن خلیفه آل ثاني د مړینې له کبله هغوی ته د خواخوږۍ، خواشینۍ او ډاډګېرنې مراتب وړاندې کړل.