نړۍ
په یوه ځانمرګي برید کې د شمالي وزیرستان ۱۰ پاکستاني پوځیان ټپیان شول
(Last Updated On: چنګاښ ۱۴, ۱۴۰۱)
د پاکستان په شمالي وزيرستان کې د امنيتي ځواکونو پر کاروان له ځانمرګي بريده لږ تر لږه لس امنيتي کسان ټپیان دي، چې د درې هغو روغتیایي حالت د اندېښنې وړ ښودل شوی دی.
د ډان ورځپاڼې د راپور له مخې؛ دغه کاروان له ميرعلي څخه د ولسوالۍ مرکز ميرامشاه ته روان و، چې پر موټرسايکل سپاره ځانمرګي بريد کوونکي خدي بازار ته نږدې له يوه موټر سره نږدې چاودنه وکړه.
تر اوسه کومې ډلې د دغه برید مسوولیت ندی منلی.
د پوځ د عامه اړیکو دفتر د پېښې په اړه څه ندي ویلي.
دا په تېره یوه میاشت کې پر امنیتي ځواکونو دوه یم ځانمرګی برید دی.
د روان کال د مې پر دېرشمه د شمالي وزیرستان په رزمک سیمه کې پر موټر سایکل سپاره یوه ځانمرګي بریدګر د امنیتي ځواکونو پر کاروان برید وکړ، چې ترې دوه سرتېري او دوه ماشومان ټپیان شوي دي.