د روسیې ولسمشر د پاکستان نوي لومړي وزیر ته په خپل پیغام کې د دوه اړخیزې همکارۍ پر پیاوړتیا سربېره غوښتي، چې د افغانستان د کړکېچ په حل کې پراخه برخه واخلي.

د پاکستان لڼدمهالي لومړي وزیر شهباز شریف ته د ولادیمیر پوتین د مبارکۍ په پیغام کې هیله ښودل شوې، چې روسیه او پاکستان کولی شي د افغانستان د روانې ستونزې په اوارولو او له نړیوالې ترهګرۍ سره مبارزه کې مرسته وکړي.

ولادیمیر پوتین دا راز هیله ښودلې، چې دواړه هېوادونه وکولی شي په ګډه د افغانستان د ستونزې په اواري او له نړیوالې ترهګرۍ سره په مبارزه کې ډاډمن رول ولوبوي.

د پاکستان نوي لومړي ته د ولادیمیر پوتین د مبارکۍ په پيغام کې راغلي: هلیه ده، چې د شهباز شریف د صدارت په دوره کې د روسیې او پاکستان همکارۍ نورې هم پراخې شي او د افغانستان د کړکېچ په حل او له نړیوالو ترهګرو ډلو سره په مبارزه کې مرسته وکړي.

که څه هم د اسلامي امارت له واک ته رسېد وروسته روسیې د افغانستان له نوي دولت سره ښه تعامل خپل کړی؛ خو د افغانستان له خاورې د ترهګريزو ګواښونو په اړه یې تل اندېښنه ښودلې ده.

د کارپوهانو په باور مسکو هڅه کوي، چې د خپلو ګټو د خوندي کولو لپاره د افغانستان پر وضعیت کنټرول ولري.

سیاسي شنونکی سنګر امیرزاده وایي: روسان زما په اند غواړي، چې له کوم بل دریځه پرې بریدونه ترسره نشي. تاسې ګورئ، چې دوی ډېر پخپلو ملي ګټو له مخې د تروریزم پر ځپلو ټینګار څرګندوي او فکر کوي، چې د څلورو ګاونډ هېوادونو د یو شمېر سیمو وګړي یې له القاعدې سره په اړیکه کې ول، چې کېدی شي اوس په افغانستان کې حضور ولري.

د افغانستان اسلامي امارت د ویاند مرستیال بلال کریميافغانستان د کړکېچ د حل لپاره د ګاونډ او سیمې هېوادونو همکاري اړینه بولي او ټینګار کوي، چې د افغانستان خاوره د نړۍ کوم هېواد ته ګواښ نه پېښوي او له افغانستان څخه د ترهګرو ډلو د ګواښونو اندېښنه دې نکوي.

روسیه په داسې حال کې د پاکستان له لومړي وزیره د افغانستان د کړکېچ په حل کې د همکارۍ غوښتنه کوي، چې د پاکستان پخوانی لومړی وزیر عمران خان مسکو ته له سفر وروسته له واکه لرې او شهباز شریف واکمیږي، چې وایي له لویديځ سره به خپلې اړیکې بیا ورغوي.