د سرحدونو، قومونو او قبایلو چارو وزیر نورالله نوري د سرپل ولایت په کوهستاناتو سیمه کې د «وحدت او همغږۍ له خلکو سره» ترسرلیک لاندې یوې ولسي غونډې ته ویلي؛ پخواني مداخله‌ګر دې نن د افغانستان د آزادۍ شعار نه‌ورکوي.

په دې غونډه کې د سرپل او سمنګان ولایتونو والیانو، سیمه‌ییز مسوولانو، دیني عالمانو او یو شمېر ځایي اوسېدونکو ګډون کړي و.

نوري د خپلو خبرو په یوه برخه کې ویلي، چې په اسلامي نظام کې د افغانانو عقیده، تاریخ، خپلواکي او ارزښتونه خوندي دي.

هغه زیاته کړې: «هغه کسان، چې د تېر شل کلن بهیر پر مهال یې د خپلو ناسمو موخو لپاره افغانان آزمایلي؛ نور دې د خپلواک افغانستان شعار نه‌ورکوي.»

نوموړي همداراز ټینګار کړی، چې د افغانستان خلک پر زور له اسلامي امارت سره ولاړ نه‌دي، بلکې د عقیدې، فکر، کلتور او سیاست له مخې له اسلامي نظام څخه ملاتړ کوي.

په دې غونډه کې ګډونوالو هم د اسلامي نظام د پیاوړتیا او د ملي یووالي د ټینګښت غوښتنه کړې او څرګندوي، چې اوسنی نظام په خلکو کې داخلي مشروعیت لري.

هغه زیاته کړې، د اسلامي نظام پر وړاندې دسیسې د خلکو له لوري نه‌منل کېږي.

ګډونوالو همداراز ټینګار کړی، چې د یووالي او همغږۍ پر بنسټ به د شته نظام ساتنه کوي او اجازه به ورنه‌کړي، چې د هېواد امنیت ګډوډ شي یا د افغانستان په کورنیو چارو کې لاسوهنه وشي.

د شانګهای همکاریو ټولنې(اس‌سی‌او) سرمنشي ویلي، چې د دې ټولنې او د ملګرو ملتونو د سرمنشي ترمنځ په څلورم پړاو مشورو کې د افغانستان وضعیت او د دې هېواد د ثبات لپاره هڅې د خبرو بنسټیز ټکي وه.

د دې ټولنې د سرمنشي د څرګندونو له مخې؛ دا ناسته د جون پر شپږویشتمه د نیویارک په ملګرو ملتونو مرکز کې ترسره شوې او دواړو لوریو د ګډو همکاریو اړوند بېلابېلو موضوعاتو په اړه اندونه وړاندې کړي دي.

د راپور له مخې؛ د ملګرو ملتونو پلاوي د «اقلیم، سولې او امنیت» د اړوند اجنډا په چوکاټ کې د خپلو فعالیتونو، د افغانستان د ثبات لپاره هڅو او د منځنۍ آسیا له هېوادونو سره د تلپاتې سولې او ثبات په برخه کې د مرستو په اړه معلومات وړاندې کړي دي.

همداراز د شانګهای همکاریو ټولنې پلاوي مقابل لوري ته د دې بنسټ د راتلونکي سرمشریزې د چمتووالي، د قرغزستان د دورې د غونډو د پایلو او د بنسټ د اصلاحاتو د بهیر په اړه معلومات ورکړي دي.

د شانګهای همکاریو ټولنې سرمنشي ویلي، چې دا مشورې په رغنده چاپېریال کې ترسره شوې دي.

د بهرنیو چارو وزارت ویلي، چې امیرخان متقي د یوناما له نوي مرستیال او د دې بنسټ د بشري چارو همغږي کوونکي برونو لمارکي سره لیدلي او پر همکاریو یې خبرې کړې دي.

د بهرنیو چارو وزارت د څرګندونو له مخې، برونو لمارکي په دې لیدنه کې د بشري مرستو د ښه تنظیم او اغېزمن مدیریت په اړه خپل اندونه وړاندې کړل.

د خبرپاڼې له مخې؛ امیرخان متقي د بشري مرستو پر دوام ټینګار کړی او ورسره یې د پراختیايي او بنسټیزو پروژو د پلي کېدو اهمیت هم یاد کړی دی.

هغه ویلي، چې اسلامي امارت به په دې برخه کې له ملګرو ملتونو سره خپلو همکاریو ته دوام ورکړي.

د بهرنیو چارو وزارت زیاته کړې، چې برونو لمارکي د بهرنیو چارو له وزیر څخه مننه کړې او ژمنه یې کړې، چې د ورسپارل شویو دندو د ترسره کولو لپاره به خپلې ټولې هڅې وکړي. هغه همداراز په بېلابېلو برخو کې د اړیکو او همکاریو پر پراخېدا هم ټینګار کړی دی.