د نړۍ د بېلابېلو هېوادونو مشرانو په خپلو پیغامونو کې د امریکا ولسمشر ډونالډ ټرمپ ته د ولسمشرۍ د پیل مبارکي وړاندې کړې ده.

د دوشنبې پر ورځ د سلواغې پر لومړۍ ډونالډ ټرمپ د امریکا د اووه‌څلوېښتم ولسمشر په توګه د کانګریس په ودانۍ کې د لوړې مراسم ترسره کړل او له ​​څلور کلن ځنډ وروسته یې خپل دوه‌یم حکومت پیل کړ.

ډونالډ ټرمپ، چې ۷۸ کلن دی؛ د لوړې وروسته په خپله وینا کې د “امریکا د زرین پېر د پیل” په اړه خبرې وکړې او زیاتوي: “مونږ به اجازه ورنکړو، چې له مونږ ناوړه ګټه پورته شي.”

د لوړې له مراسمو وروسته د نړۍ د مشرانو لخوا د مبارکۍ پیغامونه خپاره شول او د بېلابېلو هېوادونو لوړ پوړو چارواکو پر دوه اړخیزو اړیکو ټینګار وکړ او د اوکراین د جګړې پای ته رسولو او په منځني ختیځ کې د ثبات راوستلو ته ورته مسلو یادونه وشوه.

د اوکراین ولسمشر ولادیمیر زیلینسکي په خپل پیغام کې دونالډ ټرمپ د یوې ” ځواکمنې ارادې لرونکی  ” مشر وباله او وایي، چې د هغه د سولې پالیسي د امریکا د مشرتابه د پیاوړتیا او د اوږدمهاله او عادلانه سولې د ترلاسه کولو لپاره یو فرصت دی.

د ترکیې ولسمشر رجب طیب اردوغان هم د اوکراین پر وړاندې د روسیې د جګړې د پای ته رسولو په اړه د ټرمپ څرګندونو ته نغوته ( اشاره) وکړه او وایي: هېواد یې چمتو دی، چې د شخړې د ژر حل لپاره هر ډول اړین اقدام وکړي.

د اسرائیلو صدراعظم بنیامین نتنیاهو، په غزه کې د اسرائیلي یرغمل شویو د خوشې کولو لپاره د ډونالډ ټرمپ هڅو ته په نغوته کې ویلي؛ هغه چمتو دی، چې له هغه سره د پاتې یرغمل شویو د بېرته راستنېدو، د حماس د امکاناتو ویجاړولو او په غزه کې د حماس واکمني پای ته رسولو لپاره همکاري کار وکړي.”

د اروپايي مشرانو په ګډون د ایټالیا صدراعظم جورجا ملوني، د بریټانیا صدراعظم کییر سټارمر او د جرمني صدراعظم اولاف شولتز د خپلو هېوادونو او امریکا ترمنځ د اوسنیو اړیکو ستاینه وکړه او له واشنګټن څخه یې وغوښتل، چې له اروپايي اتحادیې سره ځواکمنې اړیکې وساتي.

ایراني چارواکو د ډونالډ ټرمپ د دوه‌یمې ادارې د پیل په اړه په رسمي ډول غبرګون ندی ښودلی.

د حماس ډلې، چې امریکا یې ترهګر وسلوال ګڼي، هم سپینې ماڼۍ ته د ډونالډ ټرمپ د راستنېدو په اړه غبرګون ښودلی.

د حماس یوه چارواکي سامی ابوزهري د جو بایډن د ولسمشرۍ د “تیاره پېر” پر پای ته رسېدو خوښي څرګنده کړې، چې “په لومړي سر کې یې پخپله امریکا ته زیان ورساوه” او وایي: “مونږ هیله لرو، چې ټرمپ خپله پالیسي پر متوازنو بنسټونو ودروي او د نتانیاهو د شر پر وړاندې لاره وتړي.”

د سوریې مشر احمد الشرع هم ډونالډ ټرمپ ته د هغه د ولسمشرۍ مبارکي وویله.

د احمد الشرع په پیغام کې راغلي، چې د امریکا د ولسمشر په توګه د ډونالډ ټرمپ ټاکنه “د هغه باور ثبوت دی، چې امریکایان یې پخپل مشرتابه لري.”

په پیغام کې هغه دا باور هم څرګند کړ، چې ډونالډ ټرمپ به “منځني ختیځ ته سوله راولي” او “مونږ د دواړو هېوادونو ترمنځ د خبرو اترو او همغږۍ پر بنسټ د اړیکو ښه کولو ته سترګې پر لار یوو.”

دغه راز پاناما د ټرمپ څرګندونې رد کړې.

د پاناما ولسمشر، د ډونالډ ټرمپ د لوړې په مراسمو کې د څرګندونو له ردولو سره یو ځل بیا ټینګار وکړ؛ د پاناما کانال به د هېواد په لاس کې وي او “هیڅ هېواد حق نلري، چې په دې مسله کې لاسوهنه وکړي.”

خوزه رائول مولینو د ډونالډ ټرمپ د لوړې له وینا لږ وروسته په یوه خبرپاڼه کې ولیکل: د پاناما کانال د پانامایانو لپاره و، دی او به وي.”

د دوشنبې پر ورځ، د خپلې لوړې په مراسمو کې ډونالډ ټرمپ یو ځل بیا د کانال د ملکیت د بېرته ستنولو غوښتنه وکړه او وایي: “چین په پاناما کانال کې فعال دی. مونږ دا کانال چین ته ندی ورکړی؛ مونږ دا کانال چین ته ندی ورکړی پاناما ته مو ورکړی او اوس يې هم بېرته اخلو.”

دغه راز د ډونالډ ټرمپ له وینا څو ساعته وروسته د پاناما چارواکو اعلان وکړ؛ دوی د هانګ کانګي شرکت پلټنه پیل کړې، چې پاناما کانال ته نږدې بندرونه کنټرولوي.

د امریکا ګاونډیانو او نږدې هېوادونو هم د ډونالډ ټرمپ د نوي احکومت د لوړې په اړه بېلابېل پیغامونه خپاره کړي.

د برازیل ولسمشر لولا دا سیلوا په بېلابېلو برخو کې له امریکا سره د خپل هېواد د قوي اړیکو ستاینه وکړه.

د کاناډا لومړي وزیر جاسټین ټروډو هم ټرمپ ته مبارکي ورکړه او یادونه یې وکړه، چې دواړه هېوادونه “په نړۍ کې ترټولو بریالۍ اقتصادي ملګرتیا لري” او “مونږ بیا د یوځای کار کولو فرصت لرو.”

ډونالډ ټرمپ مخکې له دې کاناډا ته ګواښ کړی و، چې که د خپلو ګډو پولو د کنټرول او امریکا ته د مخدره توکو د ننوتلو د مخنیوي لپاره سخته پالیسي غوره نکړي؛ نو له هغه هېواد څخه په وارد شویو توکو به درندې تعرفې ولګوي.

د کیوبا ولسمشر میګویل ډیاز کانل هم د ډونالډ ټرمپ پدې کار سخته نیوکه وکړه، چې د هېواد نوم یې د ترهګرۍ د ملاتړ کوونکو په نوملړ کې راوستی او دا یې “یو متکبرانه عمل او د حقیقت نه مراعات کول” وبلل.

هغه په ایکس پاڼه کې لیکلي، چې د ټرمپ د پخوانۍ ادارې لخوا د هېواد پر وړاندې بندیزونه د “توکو کمښت” رامنځته کړ او همدارنګه امریکا ته د کیوبایانو د مهاجرت لامل شو.

د جمهوري غوښتونکي ګوند ډونالډ ټرمپ د دوه‌یم ځل لپاره د ولسمشرۍ په ټاکنو کې د “امریکا لومړۍ” او “امریکا ته عظمت بېرته راوګرځوئ” له شعارونو سره سیالي وکړه.

هغه په پای کې د ۳۱۲ ټاکنیزو رایو پر ګټلو بریالی شو او د ډیموکرات ګوند سیالې نوماندې کامالا هریس ته یې ماتې ورکړه.